د چین ولسمشر (شي جین پینګ) د یو پلاوي په مشرۍ نن دوشنبه ( ۲۰۱۵ م زېږدیز/ اپریل ۲۰) د پاکستان پلازمېنې اسلام اباد ته په دوه ورځني سفر ورسېد.
په دغه سفر کې به د چیني چارواکي دپاکستان سره د ځېنو سترګو پروژو هوکړه لیکونه هم لاسلیک کړي ، چې یوه هغه یې د چین او پاکستان ترمنځ لویه غزېدلې لاره ده.
دا تړون د (CPEC) دهلیز په نامه ياديږي، چې چین د پاکستان له لارې له منځني ختیځ، اروپا او افریقا سره نښلوي.
دغه سوداګريزه لاره یا دهلیز به د چین له شمال ختیځ ښار کاشغر څخه پېل او د پاکستان د بلوچستان تر ګوادر بندر پورې غځېږي، چې ۳۰۰۰ کیلو متره اوږدوالی لري.
د راپورونو پربنسټ يادې پروژې لګښت ۴۶ میلیارډه ډالره اټکل شوی او په ۲۰۳۰ کال کې به بشپړه شي، چې پکې د لویو لارو، د اوسپنې پټلیو او د ګازو د نللیکې جوړول شامل دي.
د صدر اعظم نواز شریف او د دغه هېواد د پوځ د مشر په ګډون تقریبا ټوله کابینه د شي جي پینګ د هرکلي لپاره هوايي ډګر ته ورغلي وو.
پاکستان دا د ځان لپاره یوه تاریخي ورځ بللې.
همدارنګه داسې هم ويل کيږي، چې چین غواړي په دې پروژه کې افغانستان هم شامل کړي، ځکه دغه لاره د افغانستان د دریو ختیځو ولایتونو نورستان، کونړ او ننګرهار تر څنګ تېرېږي.
له ۹ کلونو ځنډ وروسته شي جین پینګ لومړی ولسمشر دی، چې اسلام اباد ته سفر کوي.
اسلام اباد هیله ښودلې، چې د پاکستان د اړیکو په تاریخ کې به دغه پېر یو تاریخي او برخلیک بدلونکی پېر وي.
له دې مخکې پاکستان ته د چین ولسمشر سفر ۳ ځلې ځنډېدلی و.
د پاکستان د لومړي وزير له دفتره تر هوايي ډګره پورې د غځیدلي سړک په دواړو خواوو د چین ولسمشر او پاکستان لومړي وزیر انځورونه او د ښه راغلاست پیغامونه ځړول شوي و.
په همدې ډول د ۲۱ توپونو په ویشتلو سره یې شي جین پینګ او ورسره پلاوي ته هرکلی وکړ.
له څو ورځو راهیسې په اسلام آباد کې کلک امنیتي تدابیر نیول شوي دي.
د شي جین پینګ میرمن هم په دې سفر کې د یاد پلاوي ملتیا کوي.
د پاکستان خاورې ته د چین ولسمشر د الوتکې په دننه کېدو سره د یو شمېر پاکستاني جیټ الوتکو له لوري د هرکلي مراسم پر ځای شول.
