د اداري فساد سره د مبارزې ادارې کارکوونکي وايي، په حکومت کې د ننه ځېنې کړۍ د خپل کړي فساد دوسیو خوندي ساتلو په موخه د دغې ادارې د لغوه کولو پوره هڅه کړې.
له اداري فساد سره د مبارزې عالي ادارې لسګونو مامورینو نن ورځ په یوې اعتراضیه غونډه کې د دې ادارې د لغوه کېدو او د مرکزي احصایې ادارې ته له فساد سره د مبارزې ادارې ودانۍ سپارلو په اړه د ولسمشر فرمان ناقانونه وبللو او ویې ویل، په حکومت کې دننه هغه کړۍ چې په دې اداره کې یې د فساد دوسیې پرتې دي؛ په پوره توان هڅه کوي دغه اداره لغوه شي.
د اعتراض کوونکیو په خبره، دغې ځانګړې کړۍ ولسمشر غني اغفال کړی دی او د مرکزي احصایې ادارې ته یې له اداري فساد سره د مبارزې عالي ادارې سپارلو حکم پرې لاسلیک کړی دی.
دوو تنو اعتراض کوونکیو نقیب الله او فرېبا حنیفي وویل، له اداري فساد سره د مبارزې عالي اداره ولایتونو کې ۶ حوزې لري چې په مرکز کې له ۴۰۰ زیات او هره حوزه کې په منځنۍ کچه ۲۰ کارکوونکي موجود دي؛ چې د دغې ادارې په لغوه کېدو به هغوی بېبرخلیکه شي.
دوی وايي، دغې ادارې د هغو دولتي مامورینو د فساد دوسیې څېړي چې په لوړیو دولتي بستونو کې کارکوي او دې نه پرېږدي چې محاکمه شي
اعتراض کوونکي وايي، د دغې ادارې لغوه کول او له بلې ادارې سره یو ځای کول یې د پوښتنې وړ خبره ده او حکومت باید ځواب ووایي.
خو د ولسمشرۍ ماڼۍ د ویاند دفتر سرپرست شاهحسین مرتضوي وايي، له اداري فساد سره د مبارزې عالي ادارې مشر سید حسین فخري له وړاندې په جریان کې و.
د ښاغلي مرتضوي په خبره، ولسمشر دغه پرېکړه په غور سره نیولې ده.
اعتراض کوونکي وايي، که غږ یې وانهورېدل شي؛ اعتراضونه به وکړي.
