پکـتيا کې اعتراض کوونکو د ولايت مخې ته د تحصن خېمې درولي

د پکـتيا ولايتي شورا، قومي مشرانو، عالمانو شورا او مدني ټولنو د خپلو حقونو ترلاسه کولو په موخه ګـډ اعتراضي حرکت پيل کړ او په لومړۍ ورځ يې د ولايت مقام او ولايتي شورا  مخې ته د تحصن خېمې ودرولې.

اعتراض کوونکو د کابل ــ ګـردېز په لويه لار د خبري غونډې پرمهال وویل، ولسمشر محمد اشرف غني  ور سره کـړې ژمنې نه دي عملي کړي او پکـتيا يې هره برخه کې له پامه غورځولې ده.

د پکتيا د ولايتي شورا رييس الامير بهرامزي وويل، د دې ولايت اوسېدونکي په سياسي، اقتصادي او ټولنيزو برخو کې له پامه غورځول شوي او حکومت ورسره دوه ګونی چلند کوي.

دغه راز مدني فعال او د ځوانانو د پارلمان استازي ډاکټر شفيق الله سحر د حکومت په مشرانو نیوکه وکړه، چې  په تېرو درېیوو کلونو کې يې په پکـتيا کې هېڅ ډول پراختيايي چارې نه دي ترسره کړي.  

سحر وايي، ولسمشر د ځينو کړيو له‌خوا انحصار شوی او دا کړۍ د خپلو ګټو د خوندیتوب په خاطر ولسمشر ته د ولس د ریښتوني غږ د رسېدو مخنيوی کوي.

اعتراض کوونکو د څوو ورځو له‌پاره د تحصن خېمې لګولي او وايي، که ستونزې حل نه شي لاریونونو ته به دوام ورکړي.

د پکتیا خلکو د غوښتنو او نیوکو په اړه د ولسمشر د ویاند مرستیال دواخان مينه‌پال وویل، دوه ورځې مخکې د لويې پکتيا مشرانو او ځوانانو ولسمشر ته خپلې غوښتنې وړاندې کړې او  ولسمشر ژمنه وکړه، چې په اړه به يې جدي ګامونه پورته کړي.

مينه پال وویل، د خلکو ټولې مشروع غوښتنې به منل کېږي.