ولسي جرګې د دوشنبې ورځې په عمومي غونډه کې د ولسمشر له خوا دې جرګې ته د نویو نوماند وزیرانو نه معرفي کېدو په اړه توندې نیوکې وکړې.
د ولسي جرګې لومړي مرستیال همایون همایون وايي، ولسمشر د نوماند وزیرانو په اړه په کړې ژمنه عمل نه دی کړی او د ارګ دغه کړنه له ولسي جرګې سره سیاسي لوبه ده.
همایون وویل، د ولسي جرګې غړي یو ځل بیا له ولسمشر غني غواړي چې ډېر ژر دې نوي نوماند وزیران د باور رایو اخیستلو لهپاره وروپېژني.
هغه وايي، د نوماند وزیرانو نه پېژندنې پرمهال به ولسي جرګه خپل اصلي او حقوقي ځای له لاسه ورکړي او د ملي یووالي حکومت به هم د یو دیکتاتور حکومت حیثت غوره کړي.
د ولسمشرۍ ماڼۍ د ویاند مرستیال دواخان مینهپال سلام وطندار ته وویل، سلا مشورې دوام لري او ډېر ژر به د نویو نوماند وزیرانو نوملړ ولسي جرګې ته د رایې اخیستلو له پاره ورولېږي.
مینهپال د نویو نوماند وزیرانو نومونه ونه ښودل، خو ویې ویل، چې دغه کسان به متخصص او مسلکي وي.
