د ولسي جرګې د رییس ټاکلو پر سر راپورته شوې ستونزې د حل په موخه د وکیلانو له لوري د تېرې ورځې جوړه شوې ۲۷ کسیزه کمېټه وایي، د موضوع په تړاو يې تخنیکي څېړنې پیل کړې دي.
د دې کمېټی غړی خاناغا رضایي وایي، دوی په درې برخو، یانې د ۳ ورکو رایو معلومولو، د حاضري سېسټم څېړلو او د ارشیف د څېړنې په برخه کې کار کوي.
ده زیاته کړه، دا لا نهده معلومه چې کار به یې کله بشپړ شي.
خو د ولسي جرګې بل غړی ګلرحمان همدرد وایي، د ده د معلوماتو له مخې تمه کېږي چې د دې کمېټې کار نن بشپړ او سبا وکیلانو ته د خپلوموندونو په اړه راپور وړاندی کړي.
د ولسي جرګی غړی میرویس یاسیني وایي چې د ولسي جرګې ریاست ته دواړو نوماندانو ژمنه کړې چې د ۲۷ کسیزې کمېټې پرېکړه به مني.
په همدې حال کې تېره ورځ یوشمېر وکیلانو لاسلیکونه را ټول کړي او غواړي د ولسي جرګې لپاره نوی لنډمهاله رییس وټاکي او د جرګې ریاست ته د نویو نوماندانو ترمنځ بیا ټاکنې وکړي.
د ولسي جرګې غړی نصیب مقبل سلاموطندار ته وویل چې له ۱۳۰ ډېر لاسلیکونه راغونډ شوي او د دغه سند یوه کاپي د ولسي جرګې دارالانشا او بله هم ولسمشر ته استول شوې ده.
خو د ولسي جرګې ځینې نور غړي بیا دا نه مني چې ګنې د دغه سند کاپي دې ولسمشر یا هم دارالانشا ته استول شوې وي.
- د ملي شورا د ساتونکیو او وکیلانو ترمنځ په نښته کې ۵ کسان ټپیان شوي
- د ولسې جرګی د لانجې د حل لپاره پلاوی ټاکل شوی
د ولسي جرګې غړی خالد مومند سلاموطندارته وویل چې دغه سند لا ولسمشر او یا دارالانشا ته نهدی استول شوی او دوی د ۲۷ کسیزې کمېټې د کار پایلو ته سترګې پر لار دي.
د نوموړي په وینا، د جرګې د غړیو لاسلیکونه ۱۳۵ یا ۱۳۶ ته رسېدلي او که د کمېټې کار بېپایلې پای ته ورسېږي، دوی به دا لاسلیکونه بېلابېلو ادارو ته ولېږي او له مخې به یې د لنډمهالي رییس او نوي رییس لپاره د ټاکنو په اړه اقدام وکړي.
د ولسي جرګې د رییس ټاکلو پر سر تېره پنجشنبې هغه مهال لانجه راپورته شوه چې د جرګې ریاست ته د دوو نوماندانو میررحمان رحماني او کمالناصر اصولي رایې اعلان شوې او وروسته د جرګې لنډمهالي رییس میررحمان رحماني چې ۱۲۳ رایې یې اخیستې وې، ګټونکی اعلان کړ، خو ځینو وکیلانو یې پروړاندې غبرګون وښود.
د وړمې ورځې غونډې په پیل کې د جرګې د حاضرو غړیو شمېر ۲۴۷ اعلان شو چې د ګټونکي لپاره ۵۰ جمع یو رایو اخېستل چې ۱۲۴ رایې کېدې، اړین و.
خو په صندوقونو کې ۲۴۴ رایې اچول شوې وې او رحماني هم ۱۲۳ رایې درلودې چې د ۲۴۷ په نصاب نه، بلکې د ۲۴۴ نصاب له مخې یې پنځوس جمع یو پوره کړې وې. پر همدې موضوع د ځینو وکیلانو تر منځ لانجه راپورته شوه چې لا هم نهده هواره شوې.
