د پکتیا د ولایتي شورا غړي، مدني فعالان او یو شمې قومي مشران وايي، که ولسمشر ورسره پر خپلو کړیو ژمنو عمل و نهکړ، په راتلونکیو ټاکنو کې به رایې ور نهکړي.
دوی چې نن د یاد ولایت په مرکز (ګردېز) کې راټول شوي وو وویل، ۸ میاشتې مخکې پکتیا ولایت لومړۍ درجې ته لوړ شوی و، خو لا هم د لومړۍ درجې امتیازات ورکړل شوي نهدي.
پکتیاوال وايي، ولسمشر ورسره څلور کاله مخکې د یو شمېر سترو پروژو (د ګردېزـ غزني سړک، د مچلغو بند او د ګردېز ـ پټان سړک جوړولو او دغه راز د سوېل ختیخ زون حوزوي روغتون د تشکیل او امکاناتو ډېرولو ژمنې کړې وې، خو تر اوسه یې عملي کړې نهدي.
د غونډې ګډونوالو محمدحنیف احمدزي او حاجي ظاهر اوریاخېل وویل، هغه ژمنې چې د ملي یووالي حکومت، په ځانګړي ډول ولسمشر غني ورسره کړي، که ژر تر ژره عملي نهشي، په راتلونکیو ټاکنو کې به بیا رایې ور نهکړي.
په همدې حال کې د پکتیا د ولایتي شورا غړي محمدرحمان قادري هم وویل چې حکومت له پکتیاوالو سره په کړیو ژمنو کې پاتې راغلی او که ورته پام و نهشي، د پکتیاوالو ملاتړ به له لاسه ورکړي.
دا په داسې حال کې ده چې د پکتیا چارواکیو تر دې وړاندې په دغه ولایت کې د پروژو نه پلي کېدو اصلي لامل ناامني بللې وه او ویلي یې وو چې د برېښنا سترې پروژې د کار ترڅنګ، د مچلغو بند د سروې چارې او د زرمت سړک قرارداد یې بېلابېلو کمپنیو ته ورکړی چې چارې به یې په راتلونکي پسرلي کې پیل شي.
