د هوا په سړېدلو او د واورو د ورېدلو په دلیل د بدخشان د یو شمېر ولسوالیو د مواصلاتي لارو بندښت، د لېرې پرتو سیمو اوسېدونکي ـ چې تر ۶ میاشتو پورې یې مواصلاتي لارې د بدخشان مرکز سره بندېږي ـ د طبیعي پېښو پر وړاندې د مبارزې په برخه کې د ځايي ادارې په ناتوانۍ نیوکه کوي.
د بدخشان ولایتي شورا غړی طلبالدین قادري وايي، ځايي چارواکي هر کال د طبیعي پېښو پرمهال د ځواب ویلو په برخه کې کمزوری عمل کوي او له احتمالي پېښو د مخنیوي په برخه کې هېڅ ډول چمتووالی نهلري.
د هغه په وینا، ترڅو چې د طبیعي پېښو تر ګواښ لاندې سیمو کې له وړاندې ګُدامونه او ستراتیژیکې زېرمې جوړې نهشي؛ له زیانمنو سره د مرستې رسولو بهیر به د تل لهپاره ناکام وي.
دوی د نیوکې په ډول وايي، دولت هر وخت هغه مهال اقدام ښيي چې خبره له خبرې تېره وي.
د بدخشان د یوې سرحدي ولسوالۍ اوسېدونکی جواد سیدي سلاموطندار ته وايي، د خوراکي توکیو، د حیواناتو د وښو، د درملو او د اړتیا وړ غیرخوراکي توکیو کمښت، دوی د طبیعي پېښو ګواښ او دوی ته د چارواکیو نه لاسرسي په اړه اندېښمن کړي.
دی د اندېښنې په څرګندولو سره وايي، له بدهمرغه کله چې یوه پېښه رامنځته شي؛ نه د ټپیانو لهپاره درمل وي او نه هم زیانمنو خلکو ته خوراکي او غیر خوراکي توکي.
خو د بدخشان د طبېعي پېښو د مخنیوي ادارې مسوولان وايي، د طبیعي پېښو د رامنځته کېدا او د هغو د خطرونو د مخنیوي لهپاره یې له وړاندې د مرستو رسولو پوره چمتووال نیولی دی.
بدخشان کې د طبیعي پېښو د مخنیوي ادارې مشر سیدعبدالله همایون دهقان وايي، دې ادارې د نورو مرستهکوونکیو بنسټونو په همکارۍ هرې ولسوالۍ کې د خوراکي توکیو زېرمې جوړې کړي او که کومه طبیعي پېښه رامنځته شي؛ زیانمنو کسانو سره مرسته کولی شي.
سره لهدې چې د بدخشان ځايي چارواکي زیانمنو خلکو سره د مرستې رسولو لهپاره د چمتووالي خبره کوي؛ خو د بدخشان د ولایتي شورا یو شمېر غړي وايي، همدا اوس مرکز فیضاباد سره د ۱۶ ولسوالیو مواصلاتي لارې تړل شوي او ځايي اداره د دغو لارو پرانیستلو او کوهستان ولسوالۍ کې د ځمکې ښوېېدلو پېښې زیانمنو سره مرستو رسولو کې پاتې راغلې ده.
