د افغانستان د نوي فصل په نوم ټولنې ځينو غړو د یوې اعتراضیه غونډې په ترڅ کې پر حکومت د نیوکو ترڅنګ زیاته کړه، چې اوسنی پارلمان قانوني نهدی او باید حکومت ژر تر ژره د پارلماني ټاکنو نیټه مشخصه کړي.
دوی وايي، د اساسي قانون دویم بند ۸۳ مادې پر اساس ولسي جرګه په ناقانونه توګه کار کوي.
د یاد بنسټ غړو له حکومته وغوښتل، چې اساسي قانون او ډیموکراتیک بهیرونو ته باید احترام وکړي.
« د افغانستان ولس نامشروع پارلمان نهغواړي د ولس کور پر ذلت کور بدل شوی نامشروع پارلمان ته د ولس کارت سور دی.»
د یاد بنست غړي د رڼو، عادلانه او له فساد او درغلیو لرې ټاکنو غوښتونکي دي او خبرداری ورکوي، چې که د دوی غوښتنو ته رسیدنه و نهشي د تحصن خیمې په وهلو سره به خپلو اعتراضونو ته دوام ورکړي.
خو د ولسمشر ځای ناستي ویاند شاه حسین مرتضوي سلام وطندارته وویل، چې حکومت د ټاکنو د مالي سرچینو د تامین په اړه له مرستندویه هیوادونو سره غونډې کړي او د ټاکنو کمیسیون يې هم په تخنیکي مسئلو کار کوي.
«حکومت د ټاکنو له پاره عملي اقدامات کړي دي د ټاکنو قانون توشیح شوی د ټاکنو او ټاکنیزو شکایتونو کمیسیونونو کمیشنران هم معرفي شوي دي.»
د افغانستان د نوي فصل ټولنې غړي له درې اونیو راهیسې د حکومت له خوا د ټاکنو ترسره کولو او ټاکنو نیټې اعلان په اړه سراسري کمپاین پیل کړی.
