د روسیې ولسمشر ولاديمیر پوتین د افغانستان له پخواني ولسمشر حامد کرزي سره په مسکو کې د لیدلو پر مهال ویلي دي، چې د افغانستان په ۲۵ ولایتونو کې داعش ډله حضور لري.
د روسیې د ولسمشریزې ماڼۍ د رسمي وېبپاڼې د خبر له مخې، پوتین په دې لیدنه کې " ورځ تر بلې د داعش ډلې د فعالیتونو د زیاتېدلو او د دې ډلې دریځ" او په افغانستان کې د طالبانو د عملیاتو له غځېدلو نه اندېښنه ښکاره کړې ده.
د پخواني ولسمشر حامد کرزي د رسنیز دفتر نه په خپره شوې خبر پاڼه کې راغلي دي، چې حامد کرزی د روسیې د نړویوالو اړیکو رییس ایګور ایوانوف په بلنه، په ۴ ورځني سفر مسکو ته تللی دی.
کرزي له پوتین سره په خبرو کې ویلي دي، چې په افغانستان کې د داعش ښکارنده د اسلامي دولت (داعش) سره بشپړ توپیر لري او هغه ډلې د افغانستان سره هیڅ اړیکه نه لري، په افغانستان کې د داعش ډلې ناڅاپي را څرګندېدل، د بهرنیانو په ملاتړ دی، نه زموږ د افغانانو.
په خبر پاڼه کې راغلي دي، چې کرزی به په دې سفر کې د سیمې او افغانستان په پرمختګونو، ننګونو، د بنسټ پالنې او د سولې د ټنیګښت لپاره په ګډو فرصتونو خبرې وکړي.
د روسیې ولسمشریزې ماڼۍ په خپره شوې خبرپاڼه کې د حامد کرزي له قوله ویلي دي، چې داعش د افغانستان لپاره نه دی رامنځته شوی، بلکې غواړي، چې له افغانستان نه په سیمه کې د نفوس او پراخوالي لپاره کار واخلي.
د پخواني ولسمشر د دفتر نه په خپره شوې خبرپاڼه د کرزي له قوله لیکل شوي، چې داعش د سیمې د ټیکاو د له منځه وړلو یوه ښکارنده ده.
نوموړي د سیمي هېوادونو په ځانګړې توګه د روسیې او افغانستان ترمنځ په مرستو ټینګار کړی دی.
سره له دې، چې افغانستان په تېرو ۱۳ کلونو کې په سیمه د امریکا کلک متحد و، خو له دې هر څه سره – سره حامد کرزي له روسیې سره ښې اړیکې لرلې.
د روسیې ولسمشر په داسې وخت کې په افغانستان کې د داعش د زیاتوالي او د طالبانو له فعالیتونو له ډېرېدلو خبردرای ورکوي، چې په تېره میاشت کې د افغانستان شمالي ولایتونو په تېره بیا تخار، بدخشان، کندوز کې ناامنیو زور اخیستی دی.
طالبانو څو ورځې وړاندې د کندوز ولایت دوه ولسوالۍ و نیولې، خو افغان امنیتي ځواکونو د ځانګړو عملیاتو په کولو سره دغه ولسوالي د طالبانو له ولکې خلاصې کړې.
