دغه پېښه تېره پرون ناوخته مهال د کندهار ښار په څلورمه ناحیه کې «عالي دارالمعلمین» ته څېرمه شوېده.
یوې امنیتي سرچینې د نوم نه خپرولو په شرط نن سهشنبې سلام وطندار ته وویل، چې دوو تنو ناپېژاندو موټرسایکل سپرو په سیمه کې له یو تن پرچون هټیواله له سودا اخیستلو وروسته د هغه پر مخ تېزاب شیندلي دي.
د سرچینې پر وینا، د پېښې په تور دوه تنه نیول شوي، چې تر څېړنو لاندې دي.
دا هټیوال عبدالستار نومېږي، چې د کورنۍ غړي يې وايي، له هېچا سره يې دوښمني او له دولت سره يې اړیکه نه لرله. دوی د ده د روغتيايي حالت په اړه نور څه ونه ویل.
د میرویس روغتون سرطبیب ډاکټر محمد قاسم بیا وايي، چې عبدالستار تر دا مهاله روغتون نهدی ور وړل شوی.
دا پهداسې حال کې ده، چې له تېرې اوونۍ راهیسې د امنیه قوماندانۍ لهخوا په کندهار ښار کې د امنیت د خوندي کولو په موخه پر یو موټرسایکل دوو سپرلیو بندیز لګول شوی؛ خو بیا هم د ښار په یو شمېر سیمو کې دوه تنه پر یو موټرسایکل سپاره لیدل کېږي.
