.jpg)
د افغانستان سیمهییزو ګډاګانو جشنواره نن د کابل په بابر بڼ کې جوړه شوه چې ۵۰ جنونو او هلکانو پهکې پنځه ډوله ګډاوې کوې.
د دې جشنوارې جوړوونکي نجیب فرزاد سلاموطندار ته وویل، کومې ګډاګانې چې پهدې جشنواره کې وشوې، اوږده تاریخي مخینه لري، خو اوس له یاده وتلې دي.
د نوموړي په وینا، یادې نجونې او هلکان د سیمهییزو ګډاګانو له روزنې وروسته دې جشنوارې ته راغلي چې ډېر رول پهکې د ښځینهوو دی.
د هېواد د مرکزي سیمو ګډاګانې، لکه پشپو، اخغوچي او غومبرک د مرکزي سیمو درې
ګډاګانې دي چې په تېره یوه نیمه میاشت کې یې زده کړي او نن دا ګډاګانې د نجونو او هلکانو له لوري وشوې او بله هم «خټک» ګډا ده چې مخکې په سویلي ولایتونو کې دود وه او په ننني پروګرام کې هم شامل ده.
فرزاد د سیمهییزو ګډاګانو جشنوارې جوړولو موخه د افغانستان د لرغوني کلتور راژوند کول او ساتل وبلل.
په همدې حال کې د سیمهییزې ګډا یوې لوبغاړې قدریې اذرنوش سلاموطندار ته وویل چې تر یوې میاشتې تمرین وروسته یې د پشپو په نوم ګډا زده کړې او نن یې د یې شپږ کسیزې ډلې له لوري نندارې ته وړاندې کړه.
.jpg)
د اذرنوش په وینا، له ګډه سره ډېره مینه لري او غواړي په راتلونکي کې پهدې برخه کې ښه پرمختګ وکړي. دا وايي، که څه هم د ګډا زده کولو پر مهال له بېلابېلو ستونزو سره مخ شوې، خو بیا یې هم خپله انګېزه نهده بایللې او هڅه کوي نوره هم وړاندې لاړه شي.
د سیمهییزو ګډاګانو نندارچیانو د دا ډول پروګرامونو جوړېدل مهم وبلل او ټینګار یې وکړ چې باید زیات او حکومت یې هم ملاتړ وکړي.
دغه پروګرام د اغاخان بنسټ په مرسته د اسیا د فرهنګ خونې له لوري جوړ شوی و.
