دغه نندارتون په افغانستان کې د سولې له پاره د بشري حقونو د مطالعاتو بنسټ، له تاوتريخوالي پرته نړۍ بنسټ او څلورو نورو بنسټونو له خوا د دارالامان په ازاده فضا کې د همغې سيمې د خلکو په ګډون پرانیستل شو.
د "سولې په اړه د زر موسکاوې" انځوریز نندارتون جوړونکي وايي، چې په دغه نندارتون کې له سلو زیات انځورونه، چې په ۶ میاشتو کې د هېواد له بېلابېلو سيمو اخیستل شوي نندارې ته وړاندې شوي.
په افغانستان کې د سولې له پاره د بشري حقونو د مطالعاتو بنسټ مشره لیلا جعفري د دغه نندارتون د موخې په اړه وايي: " د دغه نندارتون تر ټولو عمده تاثیر دا دی، چې د ځوان نسل پېغام د سولې مذاکره کوونکو او ناقضینو ته ورسوي" چې ځوان نسل له نورو سره توپير لري، له خپلو حقونو څخه خبر دي او دوی سوله غوښتونکي او سوله مننوونکي دي.
د کابل پوهنتون استاده خدیجه مرادي د دغه نندارتون په اړه وايي، چې " موسکا د خوشالۍ نښه ده".
د هغه پر خبره، په هره اندازه، چې د یو موضوع په اړه موسکا تبلیغ شي، نو په هماغه اندازه مثبت اثر لرلی شي.
خدیجه زیاتوي، امکان لري، چې زیات خلک د دغو نندارتونو په ارزښت پوه نه شي خو "زما په نظر دا ټول په يوه ټولنه کې د سوکالې او هوساینې سمبول دی "
د دغه نندارتون جوړونکي وايي، چې یاد نندارتون به د ټول افغانستان په ګډون له هېواده بهر هم جوړ کړي.
د سولې له پاره د زر موسکاوې په نوم به دغه نندارتون په راتلونکو څو ورځو کې د کابل په بېلابېلو سيمو کې جوړ شي.
