جمعهخان کریمي یې نن خاورو ته وسپارلو. ۵۴ کلن کریمي یوه ورځ مخکې د کابل د چهاردهي د چهارکلا په پخشک کلا سیمې کې په مرموز ډول ووژل شو.
د نوموړي خپلوان او دوستان د جنايي جرمونو او وسلهوالو غلاوو زیاتوالي په اړه اندېښنې ښيي او وايي، د امنیت ټینګښت په برخه کې د مسوولانو نه پام د دې لامل شوی چې دوی په وروستیو میاشتیو کې خپل څلور دوستان او خپلوان له لاسه ورکړي.
د جمعهخان وراره جانمحمد وايي، تره یې تېره ورځ ګهیځ وخته د خپلې هټي د توکیو اخېستلو لهپاره ښار ته روان شو او ګړۍ وروسته یې د ټپيکېدو خبر ورکړل شو. د ده په خبره، جمعهخان له هېچا سره دوښمني نه لرله.
د بهادرخان سیمې د خلکو وکیل حبیبالله بازل وايي، جنايي جرمونه زیات شوي؛ خو پر خلک یې پرخلاف د مبارزې لارې چارې پېژني، کهچېرې حکومت او وژونکې ډلې فکر وکړي چې لهدې لارې خلک خاموشه کولی شي؛ اشتباه کوي.
د کابل د امنیې قوماندانۍ ویاند بصیر مجاهد سلاموطندار ته وویل، پولیسو پهدې اړه پلټنې پيل کړېدي. هغه وايي، اوس هم په کابل ښار کې امنیتي ستونزې شته؛ خو پولیس یې د مخنیوي به هڅه کې دي.
په کابل کې د جنايي جرمونو زیاتېدو په اړه داسې مهال اندېښنې راپورته کېږي چې د کابل امنیې قوماندانۍ دوه اوونۍ وړاندې ویلي وو چې ۵۰ سلنه د جنايي جرمونو کچه راکمه شوېده.
په ورته وخت کې د کابل د چهاردهي د چهارکلا د پخشک کلا کلي اوسېدونکي خبرداری ورکوي، تر هغې چې حکومت د دوی غوښتنو ته جدي پام ونهکړي؛ له خپلو قانوني او مدني حقوقو نه ګټنه کوي.
وژنې، جنايي جرمونه او وسلهوالې غلاوې یوازې د کابل په پخشک کلا پورې نه خلاصه کېږي، بلکې ټول کابلښاریان دې ګواښ اندېښمن کړيدي.
