د پکتیا او بلخ زرګونو اوسېدونکيو په یادو ولایتونو کې په ځانګړیو مراسمو سره د امنيتي ځواکونو ورځ ونمانځله.
د پکتیا ولایت قومي مشر جنت خان منګل په دې اړه جوړې شوې غونډې ته وویل، افغان امنیتي او دفاعي ځواکونو په سوېل ختیځو ولایتونو کې د سر په بیه د خپل هېواد او خلکو دفاع کړې او خلک یې قربانۍ ستايي.
نوموړي له حکومته وغوښتل چې په جګړه کې د شهید شویو سرتېرو ټول حقونه د هغوی کورنیو ته ورکړي.
منګل دغه راز ټینګار وکړ چې د امنیتي او دفاعي ځواکونو د مرګژوبلې کمولو لپاره دې په سوېل ختیځ زون کې د ۲۰۳ تندر قول اردو ته هليکوپټرې ورکړل شي چې پر خپل وخت اکمالات وکړي.
په همدې حال کې د پکتیا والي شمیم خان کټوازي د ۱۰۰۰ وژل شویو سرتېرو کورنیو ته د کورونو د وېش خبر ورکړ.
نوموړي وویل، یادو کورنیو ته به د دغه ولایت په مرکز ګردېز ښار کې کورونه ورکړي او ترڅنګ به یې د بچیانو او د کورنۍ نورو غړیو ته د زدهکړو اسانتیاوې هم برابرې کړي.
بلهخوا د بلخ په مرکز مزارشریف کې هم د سرتېري ورځ په شاندارو مراسمو سره ونمانځل شوه.
سرتېری؛ د پولیس لهپاره ویښتیا او ځیرتیا لومړی شرط دی
هغه سرتېری، چې ځان یې له وطنه قربان کړ: هېڅ نه لرم
په غبرګو پښو معیوب سرتېری اوس هم د وطن دفاع کوي
یو شمېر قومي مشرانو، مدني فعالانو، ښځو او حکومتي چارواکیو پهدې غونډه کې د امنیتي او دفاعي ځواکونو قربانۍ وستایلې.
دا په داسې حال کې ده چې افغانانو تر دې وړاندې د هېواد په بېلابېلو ولایتونو کې د طالبانو د قطر دفتر د رییس شېرمحمد عباس ستانکزي د هغو څرګندونو پر وړاندې توند غبرګون ښودلی و چې د امنیتي او دفاعي ځواکونو د منحلېدو په اړه یې کړې وې. هېوادوالو په دې غبرګون کې د هېواد په ګوټ ګوټ کې کې د افغان ځواکونو د ملاتړ او ستایلو په اړه سترې غونډې جوړې او پراخ لاریونونه وکړل.
