وروسته له هغه، چې د طلوع ټلویزیون پورې اړوند "موبي ګروپ" پر کار کوونکو ځانمرګی برید وشو او په پایله کې يې ۷ تنه کارکوونکي ووژل شول، د دې ترڅنګ، چې پر حکومت او افغان امنيتي ځواکونو شدید انتقادونه وشول په دې وروستيو کې د رسنيو پر مالکانو هم سخت انتقادونه کيږي.
ځينې وايي، چې د رسنيو مالکان د خپلو کار کوونکو د امنیت له پاره هيڅ تدابیر په پام کې نه دي نيولي.
یو شمېر ښاریان او د ټولنیزو شبکو کاروونکي په دې باور دي، چې د رسنيو مالکان د خپلو شخصي ګټو له پاره د کارکوونکو ځان په خطر کې اچوي.
وسله والو طالبانو ويلي، چې د طلوع ټلویزیون کار کوونکو ته يې ځکه سزا ورکړې، چې نور باید د طالبانو په هکله کاذبو او رسوايي خپرونو ته د پای ټکی کېږدي.
دوی ویلي، چې نورې رسنۍ هم باید د طالبانو په هکله له کاذبو خبرونو له خپرولو لاس واخلي.
وسله والو طالبانو شاوخوا درې میاشتې وړاندې وروسته له هغه طلوع ټلویزیون ته د خپلو نظامي اهدافو په نوملړ کې ځای ورکړ، چې د دغه رسنۍ له لارې پر کندوز ولایت له برید وروسته د طالبانو په هکله د جنسي تېري راپور خپور شو.
په دغه راپور کې داسې ویل شوي وو، چې وسله والو طالبانو د کندوز له نيولو وروسته پر ځينو ښځو او د ليليې پر نجونو جنسی تیری کړی.
داسې راپورونه هم شته، چې د موبي ګروپ او طلوع ټلویزیون امنيتي کارکوونکو پر کارمندانو د برید راپور مخکې له مخکې درلود، خو دغه امنيتي کارکوونکي د طالبانو پرلپسې امنيتي ګواښونو ته جدي توجه و نه کړه.
د افغانستان د ازادو رسنيو(نی) د څار کمېسیون مشر صدیق الله توحيدي سلام وطندار ته وویل، که چېرې د رسنيو مالکان د ګواښونو په اړه معلومات لري او د خپلو شخصي ګټو په خاطر يې په اړه بې پروايي ښودلې، نو د رسنیز تخلف مرتکب شوي دي.
.jpg)
هغه زیاته کړه، چې د رسنيو د مالکانو بې پروايي د خپلو کارمندانو څخه د وسیلې په توګه ناوړه ګټه اخیستنه ده.
د نی رییس وايي، چې د رسنيو مالکان د خپلو کارکوونکو د امنیت خوندي کولو په برخه کې مسوول دي او د ټولیزو رسنیو د قانون پر بنسټ رسنۍ باید خپلو کار کوونکو ته سالمه فضا رامنځ ته کړي.
د خبریالانو د مصوونیت د کمېټې رییس نجیب شریفي وايي، د رسنيو مالکان هيڅ حق نه لري، چې د شخصي ګټو په موخه د خپلو کار کوونکو څخه د وسیلې په ډول ناوړه ګټه واخلي.
د هغه په باور ټولې رسنۍ مکلف دي، چې د خپلو کارکوونکو د امنیت او ساتنې له پاره لازم تدابیرونه په پام کې ونیسي.
شریفي زیاتوي، چې د خبريالانو د مصونیت کمیټه پر يوې داسې طرحې کار شروع کړی، چې له مخې به يې د خبریالانو د امنیت په برخه کې رسنۍ مکلف کوي.
د افغانستان د رسنيو فدراسیون د دغه برید څخه یوه ورځ وروسته اعلان وکړ، چې طالبان تروریستان دي او د افغانستان رسنۍ به دغه برید ته ځواب ووايي.
د دغه فدراسیون په وینا، له دې وروسته به د طالبانو او رسنیو ترمنځ روابط په جدي ډول تغیر وکړي.
دغه فدراسیون د موبي ګروپ پر کارمندانو د برید ورځ ( تورې چهارشنبې) نومولی دی.
یاده دې وي، د ملي امنیت ریاست هم تېره ورځ اعلام وکړ، چې ۸ تنه داسې کسان يې نيولي، چې د موبي ګروپ پر کارکوونکو د ځانمرګي برید کې لاس درلود.
د ملي امنیت ریاست وویل، چې دغه ترهګر یې د کابل ښار په بګراميو کې نيولي او د حقاني شبکې په غړو پورې اړه لري.
