تمه ده، چې چین په پاکستان کې ۴۶ میلیارډه امریکايي ډالره پانګوونه وکړي، چې د دې پانګونې ډېره برخه د چین او پاکستان د اقتصادي لارو جوړېدو ته ځانګړې شوې.
د افغانستان د بهرنیو چارو وزارت د ستراتیژيکو مطالعاتو مرکز رییس فرامرزتمنا وایي، افغانستان، پاکستان او چین یو بل سره لکه د هندسي مثلث شکل لري.
د فرامرز تمنا په وينا، پاکستان کې د چین هر ډول پانګونه د افغانستان پرامنیتي، سیاسي، اقتصادي او ټولنیزو برخو مخامخ مثبت اغیز لرلی شي.
تمنا سلام وطندارته وویل، چې د چین او پاکستان اړیکې پياوړي کېدل افغانستان ته د ا چانس برابروي، چې د چین له لارې پر پاکستان فشار راوړي.
نوموړي زیاته کړه، په هره اندازه، چې د چین او پاکستان اړیکې قوي شي په همغه اندازه افغان حکومت کولای شي د چین له نفوذ څخه په ګټې اخیستنې پر پاکستان فشار راوړي.
خو تمنا دا هم وویل، په پاکستان کې د چین له پانګونې څخه به ځينې پېسې د مخالفو وسله والو جیبونو ته لاړې شي، چې دا به خپله وخت په ډاګه کړي.
فرامرز تمنا په سیمه کې د هرډول اقتصادي اړیکو پراخېدل د افغانستان په ګټه بولي.
نوموړی وایي، د پاکستان په شمالي برخه کې د چین پانګونې ښايي افغانستان ته د ترهګرو مخنیوی هم وکړي، ځکه په شمالي برخوکې ډېر وګړي په بې وزلۍ کې ژوند کوي او د ده په وینا دا چاره به افغانستان په منځ مهاله کې د امنيت او سولې څښتن کړي.
خو داقتصادي مسایلو کارپوه محب شریف وایي، چې په پاکستان کې د چین پانګونې افغانستان ته یواځې اقتصادي ګټې لري.
شریف وویل، پخوا چې کوم سوداګریز توکي افغان سوداګرو له چین څخه راوړل اوس په کم وخت او کم لګښت سره د پاکستان له بندرونو ترلاسه کېدلی شي.
د شریف په وينا د چين له خوا دغه اقتصادي پروژه به د پاکستان پر امنيت مثبت اغېز وکړي، خو د افغانستان امنيت ته يې ګټه نه شي رسېدلی.
پاکستان هیواد ته د چین هیواد ولسمشر په خپل ۲ ورځني سفر کې د هغه هېواد سره بېلا بېلې اقتصادي پروژې لاسلیک کړې.
د چين ولسمشر درې میاشتې وړاندې پاکستان ته د رسمي سفر پلان درلود، خو په چين کې د سياسي ګوندونو لاريونونو له کبله يې سفر و ځنډېد.
اخوا د دغه اقتصادي پروژې په اړه د پښتونخوا ملتپاله سیاسي ګوندونه کلک مخالفت څرګندوي او زیاتوي، چې له دې پروژې یواځې د هغه هېواد پنجاب ایالت ته ګټه ورکول کيږي.
