له نیپاله خپاره شوي راپورونه وايي چې په دغه هیواد کې د تېرې اونۍ زلزلې له امله فرهنګي او تاريخي مقاماتو ته سخت زیان اوښتی دی.
د سرچينو په وینا د يونیسکو له اړخه د لرغوني فرهنګي ځایونو په توګه نومول شوي مینارونه هم اغیزمن شوي او درزونه په کې راغلي دي.
د نیپالي ټایمز مسول مدیر رسنيو سره په خبرو کې ویلي دي چې ددغه هیواد دکټمهنډو په ښار کې د تاريخي ودانيو زیاته برخه زیانمنه شوې او ځېنې داسې ودانۍ هم په کې شته چې د بیا رغونې وړ نه دي.
د کټمهنډو د لرغوني بهکتاپور ښار نږدې ۸۰ سلنه ودانۍ او مذهبي مندرونه ځپل شوي دي.
په دغه ښار کې په ۱۶ پېړۍ کې ودان شوی مندر هم ړنګ شوی دی، دغه مندر د کاڼي له ودانيو او د زرو په اوبو کې جوړو شيو مجسمو له امله زیات شهرت درلود.
د تېرې اونۍ د شدیدې زلزلې له امله په پنځمه عیسوي پړۍ کې د بوناتهـ مندر هم له منځه تللی دی.
دا لومړی ځل نه دی چې په نیپال کې دا ډول زلزلې رامنځته کيږي خو دا لومړی ځل دی چې د زلزلو له کبله په دومره زیاته کچه ددغه هیواد فرهنګي او تاريخي اثار له منځه ځي او ویجاړيږي.
