په نولس ولایتونو کې د سختو بارانونو له کبله راغلیو سېلابونو ۱۵۱ کسان مړه کړي او ۲۵۰ نور یې ټپیان کړي دي.
دغه سېلابونه د چهارشنبې شپې په نیمايي کې د پروان په چاریکار ښار، د کابل په سروبي ولسوالي او په کاپیسا، پنجشېر، میدانوردګ، لوګر، ننګرهار، پکتیا، پکتیکا، نورستان، لغمان، خوست او یوشمېر نورو ولایتونو کې راغلي دي.
د پروان د والي ویانده وحیده شهکار وايي، تر اوسه په چاریکار ښار کې راوتلیو سېلابونو ۹۰ کسان مړه کړي او ۱۰۶ نور یې ټپیان کړي دي.
د پروان د روغتیا رییس صفيالله وارسته وايي، د خلکو د ژغورنې په عملیاتو کې تر اوسه لسګونه جسدونه او له ۱۰۰ ډېر ټپیان د دغه ولایت روغتونونو ته ور وړل شوي دي. د نوموړي په وینا، تر اوسه د ژغورنې عملیات روان دي او د اوښتې مرګژوبلې شمېر به ډېر شي.
د طبیعي پېښو پر وړاندې د مبارزې په چارو کې د دولت وزارت ویلي چې د کابل په سروبي ولسوالي کې هم د راوتلیو سېلابونو له کبله ۱۹ کسان مړه شوي دي.
د کاپیسا د والي ویاند قیس قادري وايي، د دغه ولایت د کوهبند ولسوالي په شاواخ او ارامکوت سیمو کې د راوتلیو سېلابونو له کبله ۲۰ کسان مړه، ۱۹ ټپیان او ۴ نور ورک دي.
د کوهبند ولسوال سیفالرحمان خلیلي وايي، ښايي د اوښتې مرګژوبلې شمېر لوړ شي او د یوه پل د نړېدو له کبله له کلیو سره د دغې ولسوالي د تګراتګ لاره تړل شوې ده.
د کاپیسا د پېښو پر وړاندې د مبارزې ریاست سرپرست محمدشریف امین وايي، له تېرو ۳۶ ساعتونو راهیسې د دغه ولایت په کوهبند، نجراب، لومړۍ او دویمې حصې ولسوالیو کې سېلابونه روان دي.
د کاپیسا د روغتیا رییس محمدشعیب دانش وايي، تر اوسه ۹ جسدونه او ۱۲ ټپیان د دغه ولایت روغتیايي مرکزونو ته ور وړل شوي دي.
بلهخوا د پنجشېر د والي ویاند منصور عنابي وايي، په دغه ولایت کې د راغلیو سېلابونو له کبله ۳ کسان مړه او ۲ نور ټپیان دي.
د پنجشېر د والي مرستیال محمدامین صدیقي وايي، د دغه سېلاب له کبله د شُتل، عنابه، رُخه، دره او ابشار ولسوالیو اوسېدونکو ته زیان رسېدلی دی. صدیقي وايي، د عمومي او فرعي سړکونو د تړل کېدو له امله تر اوسه په دغه ولایت کې د سېلابونو له کبله د اوښتې مرګژوبلې کره شمېر نه دی معلوم.
د پنجشېر د روغتیا رییس شېردل دانش وايي چې په دره ولسوالي کې یو روغتیايي مرکز هم ویجاړ شوی او د دغه ریاست یو امبولانس هم اوبو وړی دی.
د میدان وردګ د والي ویاند محبالله شریفزی هم وايي چې د دغه ولایت په نرخ، جلرېز، دایمیرداد، چک او سیداباد ولسوالیو کې ۷ کسان مړه شوي، ۳۰ ټپیان دي او ۴ ماشومان ورک شوي دي. هغه زیاتوي، د پرون ورځې له ماسپښېن راهیسې په دغه ولایت کې سېلابونه روان دي.
سېلابونو په ننګرهار کې هم مرګژوبله اړولې ده. د ننګرهار د والي ویاند عطاالله خوګیاڼی وايي، د یادو سېلابونو له کبله ۲ کسان مړه او ۴ ټپیان شوي دي.
په ولایتونو کې د پېښو پر وړاندې د مبارزې ریاست وايي چې په کابل، پروان، کاپیسا، میدانوردګ، پنجشېر، ننګرهار، لوګر، پکتیا، پکتیکا، نورستان، لغمان خوست ولایتونو کې د لومړنیو شمېرو له مخې، ۱۵۰۰ کورونه ویجاړ شوي، څو هټۍ او ۱۱۵۰ جریبه کرنیزه ځمکه له منځه تللې او ۶۰۰ مالونه هم مړه شوي دي.
