دولتي چارواکي د نوم د نه ښودلو په شرط سلام وطندار ته وویل، چې د وانټ وایګل ولسوالۍ کې پر وسلوالو د بې پيلوټه الوتکو د برید له امله ۸ تنه وسله وال وژل شوي دي.
د نورستان ولایت شورا رییس انجینیر سعاد الله وایي، چې په دغه برید کې ۵ تنه وژل شوي، چې ۲ یې ملکي وګړي او ۳ یې وسله وال دي.
د سعاد الله په وینا، په وژل شویو عام وګړو کې یو تن مولوي قوس نومېده، چې وخت ناوخت به یې د ولایتي شوا دفتر ته د خلکو د ستونزو د هواري په موخه راتللو.
د نوموړي په خبره، د نورستان وانټ وایګل هغه سیمه ده چې مخابراتي شبکې په کې په سم ډول کار نه کوي او کله چې څوک غواړي د مبایل له لارې له چا سره اړیکه ونیسي، نو یو معلوم ځای ته چې هلته مخابراتي شبکې په سم ډول کار کوي؛ ورځي.
د ده په باور دا هماغه ځای دی، چې د اړتیا پر وخت د عامو وګړو تر څنګ وسله وال مخالفین هم د اړیکو نیولو لپاره ورځي.
د ده په وینا، بې پیلوټه الوتکې د مخابراتي شبکو او سیم کارت له لارې دغه ځای په نښه کړی او د وسله والو ترڅنګ یې عام وګړي هم وژلي دي.
سعاد الله وویل، په وانټ وایګل کې له تېرو څلورو ورځو راهیسې، بې پیلوټه الوتکې ۵ بریدونه کړي، چې له امله يې ۱۵ تنه وژل شوي، چې ۲ په کې عام وګړي دي.
وانټ وایګل او کامدېش د نورستان په ختیځ کې هغه دوې ولسوالۍ دي، چې وسلوال په کې ډېر فعال او کله ناکله د بې پیلوټه الوتکو تر برید لاندې راځي.
همداراز په وانټ وایګل ولسوالۍ کې د نورستان لپاره د وسله والو طالبانو پخوانی نومول شوی والي مولوي دوست محمد هم د بې پیلوټه الوتکې په برید کې وژل شوی و.
