د لوګر ولایت امنیې قومندانۍ ویاند شاه پور احمدزی د دریېو تنو زده کوونکو د نیولو خبر ورکوي.
نوموړي سلام وطندار سره په مرکه کې وویل، دغه ماشومان د محمد اغې ولسوالۍ د "ده نو" ښوونځي زده کوونکي دي.
احمدزی وايي، چې دغو زده کوونکو په خپل جرم اعتراف کړی دی او نور څېړنو له پاره څارونوالۍ ته معرفي شوي دي.
د لوګر امنیې قومندانۍ د ویاند په خبره، دغو زده کوونکو اعتراف کړی دی، چې دریې ځلې په زرغون ښار کې د طالبانو مرکز ته ورغلي دي او دغه ماینونه یې له هغه ځایه راوړي وو.
نیول شوي زده کوونکي ۱۵، ۱۲ او ۱۱ کلونه عمرونه لري، چې یو یې د شپږم او دوه نور یې د نهم تولګي زده کوونکي دي.
د محمد اغې ولسوالۍ امنیې قومندان مطیع الله عبدالرحیمزی دغه خبر تاید وي او وايي، چې نیول شویو زده کوونکو دغه ماینونه د کابل ګردیز په لویه لاره کې د امنیتي ځواکونو له پاره ښخول.
عبدالرحیمزی وايي، چې وسله وال طالبان د ماشومانو نه په ګټنې سره ترهګریز فعالیتونه تر سره کوي.
تر اوسه پورې وسله والو طالبانو په دې اړه څه نه دي ویلي.
و مو غوښتل، چې په دې اړه د لوګر ولایت د پوهنې مسولینو نظر واخلو، خو دوی په دې اړه بې خبري څرګنده کړه.
د راپورونو پر بنسټ له دې مخکې هم وسله والو طالبانو د دیني مدرسو د زده کوونکو په وسیله د تخار ولایت په خواجه غار، اشکمش او درقد ولسوالیو بریدونه وکړل.
د ملګرو ملتونو د ماشومانو حقونو د کنوانسیون پر بنسټ هر انسان، چې له ۱۸ کلونو کم عمر ولري د ماشوم اطلاق پرې کیږي او هر ډول ناوړه ګټنه ناقانونه ده او جرم بلل کیږي.
