د پنج شنبې په ماښام یو وسله وال بریدګر د فرانسې سویل د نیس ښار په ساحلي پلي تګ ځایونو په خلکو لارې موټر بیولی، چې په پایله کې یې ۸۴ تنه ووژل شول او لسګونه تنه ټپیان شول.
دغه برید د فرانسې د ملي جشن د نمانځنې په وخت کې شوی دی.
د فرانسوي رسنیو د راپور له مخې تر اوسه د بریدګر هویت نه دی پېژندل شوی، خو د فرانسې پولیسو ویلي، چې په لارۍ موټر کې موندل شوي اسناد ښيي، چې برید کوونکی ۳۱کلن دی او تونسي الاصله فرانسوی دی.
بریدګر له یوې خوا د خلګو په ګڼه ګوڼې موټر بیولو له بلې خوايي، په پولیسو او عامو خلکو ډزې هم کولې، چې د پولیسو په ځوابیه ډزو کې وژل شوی.
د فرانسې ولسمشر فرانسوا اولاند په خپلو خبرو کې ویلي، چې هېڅ ډول ترهګریز برید به د دوی اراده کمزورې نه کړي کوم، چې دوی یې د ترهګرۍ سره د مبارزې په برخه کې لري.
دی وايي، د فرانسې هوايي ځواک به په عراق او سوریې کې په ترهګرو بریدونه وکړي.
د فرانسې ولسمشر د دغه ترهګریز برید په تړاو په دې هېواد کې بېړنی حالت درې میاشتنې نور هم تمدید کړ.
په فرانسه کې د تېر کال د نومبر په میاشت کې له ترهګریز برید وروسته بېړن حالت اعلان شو.
تر اوسه پورې هېڅ کومې ډلې د دې برید مسوولیت نه دی منلی.
