د فاریاب سیمه ییز چارواکي وايي، چې د دې ولایت د پشتونکوټ ولسوالۍ تیلان سیمه د طالبانو له خوا سقوط شوه او تر څنګ یې د دې ولسوالۍ دوه ولسي پاڅونوال چې رحمدل او راز محمد نومېږي؛ له طالبانو سره یوځای شول.
د فاریاب د ولایتي شورا غړي وايي، چې دغه دوه قوماندان له دوه ورځني جنګ وروسته مجبور شول، چې ځان طالبانو ته تسلیم کړي او د تیلان په نوم ستراتېژیکه سیمه ورپرېږدي.
ویل کېږي، چې رحمدل او راز محمد له خپلو ۶۰ وسله والو پاڅونوالو سره د مرستې ډېرې چغې وکړې، خو چا یې غږ وانه اورېد.
د فاریاب ولایت د پشتونکوټ ولسوالۍ امنیه قوماندان وايي، چې تېره ورځ په سلګونو وسله والو طالبانو د دې ولسوالۍ په تیلان سیمې باندې یرغلیز برید وکړ، چې د امنیتي ځواکونو د په شا تګ سره یې نن سهار مهال یوه امنیتي پوسته ونیوله.
د ده په خبره، د پشتونکوټ ولسوالۍ د تیلان سیمه ډېره پراخه ساحه ده، چې شاوخوا ۲ زره کورنۍ په کې اوسېږي.
د پشتونکوټ ولسوالۍ امنیه قوماندان سمونوال حیات الله سرخابي وايي، چې تر اوسه په دې نښته کې ۴ طالبان وژل شوي او ۷ تنه نور ټپیان شوي دي.
ده د امنیتي ځواکونو د تلفاتو په اړه څه ونه ویل.
د فاریاب د ولایتي شورا رییس محمد طاهر رحماني وايي، چې دوه ورځې مخکې شاوخوا ۱۵۰۰ وسله والو طالبانو د پشتونکوټ ولسوالۍ په تیلان سیمه کې پر ولسي پاڅونوالو برید پیل کړ، چې په پایله کې یې دغه سیمه په بشپړه توګه ونیوله.
رحماني خبرداری ورکوي، که دولت د پشتونکوټ ولسوالي تیلان سیمه بېرته ونه نیسي او طالبان ونه ځپي؛ نو امکان لري، چې سرحوض او د هغې اړوند نور کلي هم د طالبانو له خوا سقوط شي او د دې ولایت مرکز مینمنه د طالبانو تر ګواښ لاندې شي.
خو د دې ولسوالۍ امنیتي مسوولان وايي، چې د تیلان سیمې د نیولو له پاره امنیتي ځواکونو عملیات پیل کړي او همداوس له طالبانو سره درنه جګړه روانه ده.
وسله والو طالبانو تر اوسه په دې اړه څه نه دي ویلي.
