له پرون راهیسې د درېيم تورې په نوم پوځي عملياتو دوام د دې لامل شوي، چې د افغانستان په فاریاب ولایت کې جګړې او بريدونه لويو سيمو ته وغځيږي.
په فاریاب کې د ۲۰۹ م شاهین قل اردو د لومړي لوا ویاند محمد رضا رضايي سلام وطندار ته وویل، چې په دغه ولایت کې د درېيم تورې په نوم پوځي عمليات د فاریاب په قېصار، شېرين تګاب، خواجه سبز پوش، پښتون کوټ او المار ولسواليو کې پېل شوي، ترڅو دغه سيمې بېرته د وسله والو مخالفينو له ولکې خلاصې شي.
رضايي زياته کړه، چې افغان امنيتي ځواکونه شاوخوا ۶ کیلو مټره مخکې ورغلي او په دغه جګړه کې افغان پولیس او سيمه ييز پولیس هم د ملي اردو ځواکونو ملاتړ کوي.
د ۲۰۹ م شاهین قل اردو د لومړي لوا ویاند په وينا، په دغو بريدونو کې تر اوسه ۱۰ وسله وال طالبان وژل شوي او ۶ تنه يې ژوندي نيول شوي دي.
د راپورونو پر بنسټ افغان ځواکونو ته د وسله والو طالبانو څخه ځينې سپکې او درنې وسلې هم لاس ته ورغلي.
رضايي وايي، چې د ځايي خلکو د شتون له وجې افغان ځواکونه دغه چاڼيز عمليات په تيزۍ سره نه شي ترسره کولی.
په فاریاب کې وسله وال طالبان هم د افغان ځواکونو برید تايیدوي او ادعا کوي، چې تر اوسه يې د (ايتي سلیق) په سيمه کې یو سيمه ییز پولیس وژلی او د یو قومندان په ګډون دوه نور يې ټپیان کړي دي.
په همدې حال کې راپورونه وايي، چې د ګرزيوان په غلبان سيمه کې د سيمه ییزو پوليسو او وسله والو ترمنځ سخته نښته روانه ده.
راپورونه وايي، چې د دولت اباد په ولسوالۍ په سلګونه طالب وسله وال ځای پرځای شوي او د سيمې اوسېدونکي يې خپلو کورونو پرېښودو ته مجبور کړي دي.
