د کورنیو چارو وزارت ستر امنیتي مرستیال عبدالرحمان رحمان، چې نن سه شنبه(جون۷مه) د هیواد امنیتي وضعیت په اړه ځواب ورکولو په موخه مشرانو جرګې ته وربلل شوی و ويلي، چې په فاریاب، سمنګانو، جوزجان، تخار، سرپل او کندوز ولایتونو کې امنیتي ستونزې نه شته، خو له امنیتي ځواکونو د سیاستوالو استفادې د دغو ولایتونو اوسیدونکي اندیښمن کړي دي.
دی د دغو استفاده کوونکو نومونه په ډاګه نه کړل، خو له حکومته غواړي، چې د هیواد په شمال کې له امنیتي ځواکونو د سیاسي استفادې مخنیوي په موخه عملي ګامونه واخلي.
رحمان زیاته کړه، چې اوس د هیواد په ۱۵ولایتونو کې د منځنۍ کچې ګواښ او ۶ ولایتونه له کوچني ګواښ سره مخ دي او امنیتي ځواکونه ددغو ګواښونو له منځه وړلو له پاره په خپل ټول توان هاند او هڅه کوي.
له دې ټولو سره سره، د کورنیو چارو وزارت ستر امنیتي معین وايي، چې د تیرو کلونو په پرتله د هیواد امنیتي وضعیت ښه شوی دی.
