په زرګونو افغان پناغوښتونکي د یونان د تړل شویو پولو شاته بند پاتې دي

شاوخوا ۹ زره پنا غوښتونکي، چې زیاتره یې افغانان دي، د یونان په مقدونیې او اتن کې د بندو سرحدونو شاته پاتې دي.

دغه پنا غوښتونکي د اتریش هېواد د پرېکړې له مخې، چې په سلو کې ۸۰ سلنه اقتصادي پناغوښتونکیو ته اجازه ورکوي؛ په سرحدونو کې له خاردار سیمونو سره مخ شول.

د دغې پرېکړې په ترڅ کې اتریش، یونان ته امر کړی، چې د مقدونیې پر لوري خپل سرحدونه وتړي.

د دغې پرې کړې له عملي کېدلو نه وروسته، یو شمېر قهر شویو پناغوښتونکیو له پوله ساتو سره ونښتل او تر اوسه د افغان پناغوښتونکیو پر مخ پولې تړلې دي.

د نورو اروپايي هېوادونو د فشارونو په پایله کې، د یونان د کډوالو وزارت یو چارواکي نن (سه شنبې، د فبرورۍ پر ۲۳مه) د دغه هېواد په پارلمان کې ویلي، چې یونان د مقدونیې په پولو کې ایسارو پناغوښتونکیو ته د یوې سیاسې حل لارې په لټه کې دی.

د یونان یو چارواکي د نوم نه ښودلو په شرط ډیلي میل ورځپاڼې ته ویلي، چې د مقدونیې په پولو کې اوسنۍ ستونزې د اتریش، صبرستان او اسلووني په غوښتنه راپيدا شوې دي.

ده ویلي، چې د یونان حکومت د مقدونیې د سرحدونو په برخه کې د ستونزو په اړه کومه سیاسي حل لاره نه لري او پولې یې تړلې دي، ځکه چې یونان نه غواړي د پناغوښتونکیو په لوی پنډغالي بدل شي.