د کابل امنیتي مسولین وايي، په تېره یوه میاشت کې یې ۵۶۹ تنه د ۲۵۹ جرمي قضیو په تړاو نیولي دي.
د کابل امنیې قومندان عبدالرحمن رحیمي نن د (سپټامبر په ۱۲مه) په یوې خبرې غونډه کې وویل، دغه نیول شوي کسان د وژنو، تښتونو، غلاوو، د نشه یي توکو د قاچاق او ترهګریزو فعالیتونو په تړاو نیول شوي دي او دوسیې یې عدلي او قضايي ارګانونو ته استول شوي دي.
نوموړي همدا ډول وویل، له دغو کسانو څخه د نیول کېدو پر مهال راکټ، کلانشینکوفونه، تومانچې، لسګونه کیلو ګرامه نشه یي توکي او الکولي مشروبات په لاس ورغلي دي.
رحیمي وویل، په نیول شویو کسانو کې د انسان تښتونکو او حرفوي قاتلینو ۴۰ کسیزه ډله، ۱۲۳ تنه غله، چې په انفردي توګه یې د خلکو شتمنۍ غلا کولې، ۱۶ تنه موټر تښتونکي او ۹ تنه هغه کسان چې په ناقانونه توګه یې وسلې ګرځولې شامل دي.
د کابل امنیې قومندان زیاته کړه، په نیول شویو کسان کې ۹ تنه هغه کسان شامل دي، چې د شهید اونۍ د نمانځنۍ په ورځ د ګډوډۍ او د یو شمېر ښاریانو د وژنې او ټپي کېدو لامل شوي دي.
ده همدا ډول وویل، ډېر ژر به پاتې هغه کسان هم ونیسي، چې په دې ورځ یې ګډوډي او غوغا جوړه کړې وه.
د یادونې وړه ده، د کابل ښار پولیسو د ملي امنیت او ملي اردو ځواکونو سره په ګډه توګه پر داسې یو پلان کار کوي، چې له مخې به یې په پلازمېنه کې د هغو کسانو مخه ونیسي، چې ناقانونه وسلې ګرځوي.
