د بغلان ولایت د بَرکې ولسوالۍ ځېنې ښوونکي ادعا کوي، چې تر اوسه د دې ولسوالۍ ځېنې ښوونکي له خپلو حقونو خبر نه دي او د یوې میاشتې خدمت په بدل کې په ډېر ځنډ سره ایله ۱۵۰۰ افغانۍ میاشتنی معاش اخلي.
د د دوی پر وینا، د پوهنې ریاست ځېنې کار کوونکي د دوی حقوق خپل جیب ته اچوي او طالبان هم ترې جزیه اخلي.
د بغلان د بَرکې ولسوالۍ د تنګي مورچ لېسې ځېنو استادانو سلام وطندار ته وویل، چې تر اوسه هغوی د خپلو حقونو څخه نه دي خبر او نه پوهېږي، چې د یوې میاشتې خدمت په بدل کې څومره معاش اخلي.
دوی زیاتوي، اوسمهال د یوې میاشتې کاري خدمت په بدل کې یوازې ۱۵۰۰ افغانۍ حق الزحمه تر لاسه کوي او پاتې نورې هغه یې د پوهنې ریاست مدیریان او مالي کارکوونکي په خپل جیب کې اچوي.
د بغلان د برکې ولسوالۍ د تنګي مرچ د لېسې ښوونکی تاش مراد وايي، د ده په شان د لرو سیمو ښوونکي له خپلو اصلي حقوقو نه دي خبر او په همدې علت کم معاش ورکول کېږي، چې په پاتې پيسو یې د ولسوالۍ پوهنې مدیران او معتمدان سوداګري کوي.
تاش مراد زیاتوي، که د پوهنې ریاست کارکوونکي د تنګي مرچ لېسې ته ورشی؛ نو د ښوونکیو حیف و میل به په خپله ورته ثابت شي.
د بغلان ولایت د پوهنې رییس ډاکټر محی الدین پیکان حیدري د دې ولایت د پوهنې په اداره کې فساد تاییدوي، زیاتوي، چې د بَرکې ولسوالۍ د ځېنو لېسو د ښوونکیو د حیف و میل شویو حقوقو څېړنه به وکړي او که دا موضوع ثابته شي؛ نو ښکېل کسان به څارنوالۍ ته ور معرفي کړي.
حیدري تازه د بغلان ولایت د پوهنې رییس شوی او د بغلان د اوسېدونکیو پر وینا، د دې ولایت د پوهنې ریاست په بد وضیعت کې دی.
له دې مخکې داسې ادعاوې هم شوې وې، چې د بغلان ولایت د لرو پرتو سیمو د ښوونځيو د ښوونکیو د نه حاضرۍ له امله ښوونځي تړل شوي؛ خو ښوونکي بیا میاشتنی حقونه ترلاسه کوي. د ده په خبره، په دې اړه یې هم پلټنې روانې دي.
له دې وړاندې د بغلان د پوهنې ریاست خپل ۴ کارکوونکي د اداري فساد په تور څارنوالۍ ته ور پېژندلي وو.
