د بغلان ولایت د سرې میاشتې مسولین وايي، چې د څلورو میاشتو په لړ کې د افغان امنیتي ځواکونو او وسله والو طالبانو تر منځ په نښتو کې ۵۰ ولسي وګړي وژل شوي دي او ۱۱۰ تنه نور ټپیان شوي دي.
د دې ولایت د سرې میاشتې رییس ډاکټر حامد نیازي په یوې ځانکړې مرکې کې سلام وطندار ته وویل، چې دوی د ولسي وګړو د مرګ او ژوبلې د کره شمېرو د معلومولو په تړاو پلټنې روانې کړې دي.
نیازی د جګړې له دواړو خواوو غواړي، چې د جګړې پر مهال د ولسي وګړو ژوند ته پام وکړي.
د بغلان ولایت د سرې میاشتې رییس وايي، چې د ولسي وکړو د مرګ ژوبلې زیاته پړه پر وسله والو طالبانو وراچوي.
د دغه بنسټ پر خبره، په بغلان ولایت کې د له ۴ میاشتو راهیسې د افغان امنیتي ځواکونو او وسله والو طالبانو تر منځ په روانه نښته کې تر ټولو زیات زیانونه ولسي وګړو ته اوښتي دي.
نیازی دا هم وايي، چې د دغو نښتو له امله د ولسي وګړو له ۳۰۰ زیات کورونه ویجاړ شوي دي.
د بغلان ولایت د سرې میاشتې رییس زیاتوي، چې د قربانیانو زیات شمېر ماشومان او ښځې دي او چې ټول یې په مرکزي بغلان او ډنډغوري ولسوالیو کې وژل شوي او ټپیان شوي دي.
له بل لوري د بغلان ولایت ځای ناستی والي سلطان محمد عبادي د ولسي وګړو د مرګ ژوبلې له زیاتوالي اندېښنه ښيي او وايي، چې وسله وال طالبان د امنیتي ځواکونو په نښتو کې ولسي وګړي د سپر په توګه کاروي.
نوموړي د عامو وګړو د مرګ، ژوبلې د کره شمېرې په اړه وویل، په هغو سیمو کې چې ولسي وګړو ته مرګ، ژوبله اوښتې ده؛ د جګړې سیمې دي او له همدې کبله په دې نه دي توانېدلي، چې کره شمېر یې معلوم او مرستې ور ورسوي.
زلمی خلیل او مېرمن مرجانه د بغلان ولایت د جګړه ځپلو ولسوالیو د ولسي وګړو د قربانیان دي.
دغو کسانو سلام وطندار سره په خبرو کې وویل، چې د وروستیو نښتو له امله یې د کورنۍ غړي وژل شوي او یو شمېر ټپیان شوي دي.
د بغلان ولایت ولسي خلک له حکومته ډوډۍ، کور او کالي نه غواړي، خو یواځې څه چې غواړي؛ هغه سوله ده.
دغه شمېر خلک د ملي یووالي حکومت پر مشرانو نیوکه کوي او وايي، چې دغه مشران د ناامنیو د زیاتوالي لامل شوي دي.
