په بدخشان ولایت کې د سیمه ییزو وسله والو ډلو او سیمه ییزو قومندانان تر منځ د لاجوردو د کيندنې پر سر سیالۍ؛ دغه ولایت د ناامنۍ له ګواښ سره مخ کړی دی.
د دغه ولایت چارواکي وايي، چې د لارجوردو په کیندنې کې طالبان هم ونډه لري.
بدخشان ولایت په خپله غرنیزه لمن کې د لاجوردو ارزښت لرونکو ډبرو ته ځای ور کړی، او د دغو مشهورو ډبرو رنګینې بېلګې په نړیوالو موزیمونو کې د لیدلو لپاره نندارې ته وړاندې کېږي.
د لاجوردو د کیندنو پر سر د وسله والو سیالۍ، دغه ولایت د ناامنۍ پر تنور بدل کړی دی.
د بدخشان د والي مرستیال ګل محمد بیدار سلام وطندار ته وویل، چې د بدخشان لاجورد پر یوې معما بدل شوي دي.
د ده په وینا، دغه کان تر ۲۰۱۲ کال پورې د "لاجوردین شرکت" له لوري په قانوني ډول کیندل کېدل، خو د یو جهادي قومندان له خوا چې قومندان ملک نومیږي؛ د دغه کان واک تر لاسه کړ او د کان په غیر فني کیندنې یې شروع وکړه.
د بیدار په خبره، سیمه ییز حکومت د لاجوردو د کان د بیا نیولو ځواک نه لري، نوموړی زیاتوي، چې دغه قومندان له ۶۰۰ تر ۷۰۰ وسله والې ډلې لري او د بدخشان ولایت په کران او منجان ولسوالیو کې د لاجوردو ذخیرې جوړوي.
دی همدا راز وايي، چې مخکیني رالیږل شويو واحدونو، له یاد قومندان سره د ځېنو امتیازاتو پر سر معامله کړې وه.
د بدخشان د والي مرستیال وايي، چې د "لاجوردین شرکت" قرار داد لغوه شوی، چې له امله یې اوس د دغه کان ۴۰ سلنه ګټه د طالبانو جېبونو ته ځي.
له پرلپسې اړیکو سره – سره په دې بریالی نه شو، چې قومندان ملک سره اړیکه ونیسو.
په ورته وخت کې ولسي جرګه کې د بدخشان وکیل، ولي نیازی وايي، چې اوسمهال له دغه کان نه ۳ ډلې ګټه اخلي.
د نیازي په باور، سیمه ییز زورواکي، طالبان او ځېنې حکومتي کړۍ په مستقیم او غیر مستقیم ډول له دغه کان نه د سترې عایداتي سرچینې په ډول ګټنه کوي.
له دې مخکې هم له فساد سره د مبارزې او د کانونو د کیندې بنسټونو د بدخشان ولایت د لاجوردو د ناقانونه کیندنو نه اندېښنه ښودلې وه.
په دې وروستیو کې د کانونو وزارت اعلان کړی دی، چې په هېواد کې به د کانونو د ناقانونه کیندنې مخه ونیسي. دوی ټینګار کوي، چې تر ډېره بریده به هڅه وکړي، چې د کانونو کیندنه د حکومت په ګټه وي.
