د کار او ټولنیزو چارو وزارت مسوولین وايي، سره له دې چې په تېرو ۱۴ کلونو کې د ماشومانو د ساتنې په برخه کې زیات کارونه شوي، خو اوس هم په ټول افغانستان کې ۳ میليونه ماشومان زیانمن دي.
د یاد وزارت مرستیال واصل نور مومند وايي، چې دغه شمېر د کډوالو په راتګ او د هېواد دننه د بې ځایه شویو کورنيو له امله د زیاتېدو په حال کی دی.
نوموړي په هغه خبري غونډه کې، چې د ماشومانو د ساتنې موسسې له خوا د "ماشومانو له پاره د ستراتيژيک پلان د تشریح په موخه" جوړه شوې وه زیاته کړه، دغه ماشومان د د درانه کارونو، د جنسي استفادې، تروریستي بریدونو او نورو له پاره په ټولنه کې کاريږي.
د کار او ټولنیزو چارو وزارت د شمېرو له مخې همدا اوس په ټول افغانستان کې يو میليون او ۹۰۰ زره ماشومان په کار بوخت دي، چې د دغې شمېرې یو میلیون او ۲۰۰ زره يې د کاروباري مشرانو له خوا په شاقه کارونو بوخت دي.
خو د افغانستان د کار قانون څلورمه ماده وايي، چې پر ماشومانو د شاقه یا درانده کارونو ترسره کول منع دي.
د دغه قانون په ۱۳ مه ماده کې راغلي، چې له ۱۵ کلونو پورته ماشومانو باندې کار کول د ځانګړو شرایطو له مخې جواز لري.
هغه د ماشومانو په برخه کې د افغانستان قوانینو، بشري او د ماشومانو حقونو په برخه کې نړېوال کنسواسیونونو او اسلامي اصولو پر تطبیق ټينګار کوي.
په همدې حال کې د ماشومانو له حقونو د ملاتړ موسسې د ماشومانو له پاره د ۳ کلن پلان له تطبیق څخه خبر ورکوي.
د یادې موسسې مشر وحید احمدزی وايي، چې دغه پلان د یو کمپاین له مخې "تر اخري ماشوم" شعار لاندې پېل شوی او د ۲۰۱۸ م ز کال تر پایه پورې به دوام مومي.
دغه ۳ کلن پلان به د ماشومانو د ساتنې، تعلیم او نورو روزنیزو کړنو په موخه پلی کيږي.
له بل لوري د یادې موسسې سفیر او د هېواد مشهور سندر غاړی فرهاد دریا د ماشومانو په برخه کې د حکومت پر کړنو نيوکې وکړې او زیاته يې کړه، تر څو د هغو ماشومانو ستونزو ته چې شپه يې د سړکونو پر غاړو وي په جدي ډول رسېدنه و نه شي، نو د زیانمن شویو ماشومانو ستونزې به په بشپړ ډول حل نه شي.
