د بشري حقونو خپلواک کمیسیون نن کابل کې د جګړو پرمهال د ۱۲۰ وژل شويو ماشومانو په یاد ۱۲۰ نیالګي کېنول.
د بشري حقونو خپلواک کمیسیون مرستیال نعیم نظري وايي، هېواد کې د جګړې دوام تر ټولو زیات له ملکي وګړيو قرباني اخیستې ده.
د نوموړي په وینا، ۱۳۹۸ کال کې ۲زره او ۷۳۸ ماشومان هېواد کې د وسلهوالو نښتو قرباني شوي چې له دې ډلې یې ۴۶۰ وژل شوي او ۲زره او ۲۷۸ نور ټپیان دي.
نوموړي د «جګړه کې د قرباني شويو ماشومانو باغچې» پرانیستو مراسمو کې وویل، افغانستان د ماشومانو لپاره یو له ټر ټولو زیان لیدونکيو هېوادونو دی.
نظري زیاتوي، افغانستان کې د ماشومانو بشري وضعیت د اندېښنې وړ دی او د جګړې ښکېلې خواووې نښتو کې د ماشومانو حقوق نه رعایت کوي.
عبدالصبور د جګړې یو له قربانیانو دی او خپل دوه زامن یې یوې بمي چاودنه کې له لاسه ورکړي.
هغه هېواد کې د تاوتریخوالي کمولو او د جګړې د پای ته رسولو غوښتونکی دی.
د بشري حقونو خپلواک کمیسیون د مالوماتو له مخې، دې وروستیو لسو کلونو کې له ۲۰۰۹ کال نه تر ۲۰۱۹ کال پورې د ښځو او ماشومانو په ګډون ۸۶ زره او ۸۲۳ ملکي وګړي د ځانمرګو بریدونو، راکټي ډزو، هوايي عملیاتو او د سړک غاړې ماین چاودنو کې قرباني شوي دي.
د راپورنو پر بنسټ یوازې ۲۰۱۹ میلادي کال کې ۱۰ زره او ۷۷۲ ملکي وګړيو ته مرګژوبله اوښتې ده.
