د نړېوالو رسنيو د راپور له مخې په اسټرالیا کې د کډوالو پلویانو او مخالفانو ترمنځ اعتراضونه په تاوتریخوالي واوښتل.
د اسټرالیا د ملبورن ښار نن سهار (یکشنبه می ۲۹مه) د دوو بېلابېلو اعتراضونو شاهد و.
د معترضانو لومړۍ ډله ګډون کوونکي، چې شمېر يې شاوخوا ۳۰۰تنو ته رسېده د اسلام ضد شعارونه ورکول.
خو دویمه ډله يې بیا په اسټرالیا کې د نژاد پالنې پر ضد سړکونو ته راوتلي و.
دوی د خپل اعتراض پرمهال ویل، چې په دې وروستيو کې په اسټرالیا کې نژاد پالنه زیاته شوې.
دغه اعتراضونه هغه مهال په تاوتریخوالي واوښتل، چې لومړۍ ډله د بیرقونو د ډنډو په واسطه له مخامخ کېدو وروسته پر دويمې ډلې برید وکړ.
د اسټرالیا پولیسو هم د معترضانو د خلاصون په موخه اوښکي بهوونکي ګاز استمعال کړ.
همدارنګه د یو بل خبر له مخې د وطن دوستانو متحدې جبهې له لوري هم د ملبورن په ښار کې اعتراضونه وشول.
دغه جبهه په اسټرالیا کې د کډوالو او مسلمانانو په ضد جوړه شوې ده.
د اسټرالیا لومړي وزیر مالکوم ترنبول وویل، اسټرالیا هغه هېواد دی، چې د بېلابېلو فرهنګونو وګړي په کې اوسيږي او فرهنګي تنوع د دغه هېواد یوه لویه لاسته راوړنه ده.
د ترنبول پر وینا، هیڅوک حق نه لري، چې اسټرالیا دغه فرهنګي او ارزښتي تنوع اصل تر پښو لاندې کړي.
په منځني ختیځ کې د "داعش" ډلې له ظهور وروسته، د اسټرالیا د مسلمانانو پر وړاندې تاوتریخوالی زیات شوی.
د سیدني پوهنتون له لوري د ترسره شوې نظر پوښتنې پر بنسټ د نورو کلونو په پرتله په دې وروستیو کلونو کې د اسټرالیا مسلمانان زیات توهین او تحقیر شوي او همدارنګه د نژادي تاوتریخوالو سره هم مخ شوي دي.
