د کورنیو چارو وزارت ویاند طارق ارین وايي، په کابل کې د ناامنیو ډېروالي له کبله د دغه ولایت امنیه قوماندان له دندې ګوښه شوی دی.
کابل ښار په دې وروستیو کې د چاودنو، راکېټي بریدونو او جنايي جرمونو د ډېروالي شاهد دی.
امانالله واحدي د روان کال په وري میاشت کې د کابل د امنیې قوماندان په توګه وټاکل شو.
کابل ښار د افغانستان د خپلواکۍ ورځې د ۱۰۱مې کلیزې د نمانځنې پر مهال د ۱۴ راکېټي بریدونو شاهد و.
دغه راکېټونه د کابل د لومړۍ، دویمې، لسمې، نهمې او شپاړسمې امنیتې حوزو پر بېلابېلو برخو ولګېدل چې له کبله یې ۳ کسان ووژل شول او ۱۶ نور ټپیان شول.
کورنیو چارو وزارت دغه راز د کابل ښار د شپاړسمې او اووهلسمې امنیتي حوزو آمران له ۱۶ نورو منسوبینو سره د خپلواکۍ په ورځ د وظیفوي غفلت په تور له دندو ګوښه کړل.
دغه راز پرون په پنځمه، اوومه او پنځلسمه حوزه کې د څلورو چسپکي ماینونو په چاودنه کې یو کس ووژل شو او ۶ نور ټپیان شول.
ولسمشر غني تېره اوونۍ د کال د امنیتي ادارو له مسوولانو سره په یوه غونډه کې د امنیتي حوزو په مدیریتي کچه کې د ژرترژره بدلونونو غوښتنه وکړه.
