سره له دې، چې د کندوز ښار له بشپړ نیولو یوه اونۍ تېریږي، لا هم کندوز ښار نظامي بڼه لري او د تیارسئ حالت په کې حاکم دی.
د کندوز ښاریان په ورخطا او ناډاډمنه حالت کې ژوند کوي، دوی د ښار امنیت، اقتصادي حالت او ښاري ټیګاو ته هیله مند نه دي.
د ښار په ټولو سیمو کې تګ راتګ شته، خو یوه سراسري چوپتیا خوره ده.
د کندوز ښار چوک هغه سیمه ده، چې د وسله والو طالبانو د نښتې په بهیر کې د سختو نښتو شاهد و.
د لته نهه لوي پلورن ځایونه ویجاړ شوي دي، د کندوز چوک په سیمه کې یو تن پلورنکی چې احمد ولي نومیږي او هټۍ یې سوځېدلې ده سلام وطندار ته وویل،
هغه مهال، چې دغه ښار ته د جګړې اور را دننه شو، خلکو خپل مالونه پر ځای پرېښودل او ځانونه یې خلاص کړل.
د احمد ولي پر خبره، د کندوز ښار کوچنیو هټيو هم شاوخوا ۵۰ زره ډالره پانګه لرله او اوس یواځې د هټیو د غولي خاورې پاتې شوي دي.
ورانیو په ټول ښار خپل سیوری غوړولی دی.
د کندوز ښار یو بل اوسېدونکي عبدالحق وايي، چې په دغې نښته کې د دغه ښار اوسېدونکو نه یواځې ځاني زیان لیدلی، بلکې مالي زیانونه هم ورته رسېدلي دي.
۱۵ ورځو نښتو د خلکو شتمنۍ وسوځولې او د ښار مېشتو په باور ولسي خلک هیله لري، چې له یوې خوایې د ښار امنیت خوندي شي او له بل لوري ورته دولت د ښار په بیا رغولو کې مرسته وکړي.
ښار مېشتي تر ټولو زیاته د طالبانو له بیا ځلي راتګ څخه اندېښنه لري.
له همدې امله د کندوز ښار مېشتي له حکومت څخه غواړي، چې د دغه ولایت ټولې لرې پرتې سیمې د وسله والو طالبانو له موجودیت څخه پاکې کړي.
اوسمهال په کندوز ښار په هره څلور لاره کې افغان امنیتي ځواکونه په دندو ګومارل شوي دي او د تیارسئ په حالت کې دي.
له بل لوري له ښاره کډه شوي هم په کراره ـ کراره خپلو مېنو ته راستنیږي.
دوی هیله مندي، چې هر څه د تېر په څېر عادي حالت ته راوګرځي.
د کندوز ښار د امنیې قومندان محمد قسیم جنګلباغ وايي، چې د ښار امنیتي حالت د ډاډ وړ دی او ټول بې ځایه شوي کورنه دې خپلو سیمو ته راستانه شي.
د کندوز ښار له پاکوالي څو ورځې تېریږي، خو دولتي ادارو په پوره ډول په چارو پیل نه دی کړی.
د دغه ولایت ځای ناستي والي حمدالله دانشي د تېرې ورځې په لومړنۍ اداري ناسته کې له ټولو دولتي ادارو څخه غوښتنه وکړه، چې خپل دفترونه فعاله کړي.
کندوز ښار د تلې میاشتې په ۶مه نېټه د وسله والو طالبانو د برید په پایله کې سقوط وکړ او له څوو ورځو وروسته د امنیتي ځواکونو د پراخو عملیاتو په ترڅ کې دغه ښار د درنې جګړې ډګر شو.
له درنې نښتې وروسته ښار د امنیتي ځواکونو لاسته ورغی، د امنیتي مسولینو د خبرو پر بنسټ په دې نښته کې وسله والو طالبانو ته درنه مرګ ژوبله اوښتې ده.
