افغانستان کې د انټرنټي خدمتونو له پراخېدلو سره پرلیکه پلورنځي هم زیات شوي دي، چې دغه پلورنځي د بازار موندنې او مشتریانو د راجلبولو لهپاره زیاتره په ټولنیزو رسنیو کې تبلیغات کوي.
هغوی چې له انټرنټه ګټنه کوي؛ ځېنې یې خوراکي او پوښاکي توکي په انلاین ډول اخلي.
د دغو پلورنځیو بنسټ اېښودونکي د پرلیکه پلورنځیو وايي، غواړي چې په مډرنه توګه د پېر و پلور فرهنګ وغوړوي او د اسانتیاوو زمینه برابره کړي. دوی زیاتوي، چې په هېواد کې د پرلیکه پلورنځیو ډېرېدل د پېر و پلور عصریتوب ښيي.
پرلیکه موټر پلورونکی شهیر محسني سلام وطندار ته خوښي وښوده، چې په افغانستان کې د دې فرهنګ رواج مخ پر وده روان دی.
محسني ژمنه وکړه، چې پېرودونکیو ته د اسانتیاوو برابرولو لهپاره به خپل انلاین خدمتونه نور هم پراخ کړي.
د محسني پر وینا، انلاین پېر و پلور زیات وخت نهنیسي او د پېرودونکیو وخت ضایعکېدو مخنیوی کوي.
د یو بل انلاین پلورنځي مشر نجیب الله ناصري وايي، انلاین پلورنځيو د توکیو نرخونه ټیټ او له ډېرو اسانیتاوو برخمن دي.
د ښاغلي ناصري پر وینا، سره لهدې چې حکومت ته مالیه ورکوي؛ خو حکومت تر اوسه د دوی د فعالیت څرنګوالي په اړه هېڅ قانون نهدی طرح او تصویب کړی.
ناصري ډاډ ورکوي، چې د انلاین پلورنځي له لارې د هېواد کورني تولیدات هم هېوادوالو او بهرنیو بازارونو ته ورورسوي.
په همدې حال کې د سوداګرۍ او صنایعو خونو ویاند صیامالدین پسرلي سلام وطندار ته وویل، چې په هېواد کې پرلیکه پلورنځي د پانګې اچونې په برخه کې ګټور دي او حکومت باید د دا ډول پلورنځیو پیاوړتیا لهپاره قانون جوړ کړي.
د پسرلي پر وینا، د سوداګرۍ خونو دا موضوع څو ځلې مطرح کړې ده، چې د کمپیوټري او انټرنتي جرمونو په برخه کې او ان د الکترونیکي معاملاتو په برخه کې قوانین وضع کول ضرور دي.
د سوداګرۍ او صنایعو خونو ویاند دا هم وویل، چې نور هېوادونه هم پهدې برخه کې قوانین جوړ کړي او د هغوی پر بنسټ پېر و پلور کوي؛ خو په افغانستان کې دا ستونزه لا هم پر ځای پرته ده.
انلاین پلورونکي هم پهدې اند دي، چې پېرودونکي یې د ټولنیزو شبکو له لارې د اړتیا وړ توکي ټاکي او په کم وخت کې یې د هغوی تر ځایونو ور رسوي.
