پروان کې د کرېکټ‌بورډ د «بندامیر زون» پرانیسته وشوه

بندامیر زون کې پروان، کاپیسا، پنجشېر، بامیان، دایکنډي او میدان‌وردګ ولایتونه شاملېږي او له دې وروسته به د شپږو لوبډلو په لرلو سره فعالیت وکړي. افغان‌ کرېکټ‌بورډ همدې اړتیا ته په کتو په‌ پروان ولایت کې د بندامیر زون پرانېسته وکړه.

د افغان کرېکټ‌بورډ مشر عزیزالله فضلي پروان ولایت کې د بندامیر زون پرانيستلو پر مهال وویل، هڅه کوي هېواد کې د کرېکټ معیاري لوبغالی جوړ کړي چې یوه ورځ د نړۍ مهمو لوبډلو کوربتوب وکړي.

په ورته وخت کې د پروان والي فضل‌الدین عیار د کرېکټ بندامیر زون ودې په موخه دې ولایت کې د کرېکټ لوبغالي جوړولو له‌پاره افغان کرېکټ بورډ ته شل جریبه ځمکه په واک کې ورکړه.

د پروان والي وویل، دولت د ورزش هرې برخې لوبغاړیو سره هر ډول همکارۍ ته چمتو دی.

پر دې ټولو سربېره، پروان کې د بندامیر زون پرانیستل او د کرکت لوبغالي جوړولو له‌پاره د شل جریبه ځمکې مشخصول، د کرېکټ لوبغاړیو له تود هرکلي سره مخ شو.

پروان کې د کرېکټ دوه لوبغاړي سکندر او ضیاالحق وايي، د کرېکټ میدان نه لرلو په دلیل له ګڼو ستونزو سره مخ دي. دوی اوس خوشاله دي چې د خپلو لوبو له‌پاره به یو ځانګړی او معیاري لوبغالی ولري.

د افغان کرېکټ‌بورډ مسوولانو په باور، پروان کې د کرېکټ بندامیر زون په پرانیستلو سره د کابل‌زون هم له دغه زون سره یو ځای شوی او له‌دې وروسته به د کرېکټ معیاري کولو له‌پاره د دوی هڅې نورې هم چټکې شي.