پروان قماقخانهسی نینگ محبوسلریدن قطاری دوسیهلرینی تیکشیرهدیگن هیأت نی فساد و رشوت آلیش گه عیبلهشگن. سانی 500 کیشی گه ییتیشهدیگن مذکور محبوسلرنینگ ایتیشلریچه، کرونا ویروسی کینگهیشی نی آلدینی آلیش اوچون محبوسلردن قطاری قوییب یوباریلیشی توغریسیده جمهوررئیس آرقهلی صادر ایتیلگن بویروغدن، قطار محبوسلر واسطه و رشوت آرقهلی فایدهلنیب قوییب یوباریلهدیلر.
مذکور محبوسلردن قطاری نینگ سلاموطندارگه ایتیشیچه، جمهوررئیس غنی نینگ بویروغی برچه محبوسلرگه تیگیشلی بولهدی، بیراق اولرنینگ قوییب یوباریلیشی ولایتی قارهلاوچیلر و مذکور بویروغ نی عمل قیلیش اوچون تعیین ایتیلگن هیأت نینگ قراری گه تیگیشلی دیر.
شفیق (مستعار آت) پروان ولایتی قماقخانهسی نینگ محبوسلریدن بیری دیر. اونینگ ایتیشیچه، حبس مدتی 3 ییل ایکن و حاضرگچه 20 آی حبس نی اوتکزگن و قوییب یوباریلش شرطلرنی هم تولدیرگن ایکن بیراق قطار کیشیلرنینگ اَرهلشووی باعث حاضرگچه قوییب یوباریلمهگن.
شفیق نینگ ایتیشیچه، محبوسلرنی دوسیهسینی تیکشیریش اوچون قماقخانه گه کیلهدیگن قارهلاوچیلر شرط قویهدیلر کیم هر بیر کیشی 30 مینگ افغانی بیرگن صورتده، آتی رویخط گه کیریتیلهدی.
مذکور محبوس نینگ ایتیشیچه، کمیده 500 محبوس قارهلاوچیلرنینگ بو ایشی گه قرشی ایکی کون اعتصاب قیلیشگن. اونگه کوره، اوشبو محبوسلر ملت وکیللریدن بیری نینگ واسطهچیلیگی باعث اعتصاب دن قول تارتیشگن.
بیراق باش قارهلاوچی نینگ ایتیشیچه، جمهوررئیس نینگ بویروغی گه ماس بولگن 4099 محبوس نی قوییب یوباریش پروسهسی حاضرگچه بو نهاد نینگ نظارتی آستیده تنیقلیک بیلن عملی بولگن و شونینگدیک بو پروسه نی دوامی بار.
پروان حاکمی شاهولی شاهد محبوسلرنینگ غذایی اعتصابی نی تصدیقلب سلاموطندارگه ایتیشیچه، محبوسلر بیلن اوچرهشگن کیم اولر عدالت تأمین ایتیلیشی و جمهوررئیس غنی نینگ بویروغیدن فایدهلنیشلرینی سورهشگن.
جناب شاهد گه کوره، اعتراضچی محبوسلرنینگ جرمی کتته دیر و اولرنینگ ایستهگی نی عملی قیلیش پروان محلی حکومتی نینگ صلاحیتی دن ایمس دیر.
مملکت باش قارهلاوچیلیگی جمهوررئیس نینگ بویروغی دن سو استعمال بولگنی نی رد قیلهدی.
اوتگن کون (یکشنبه 24- حمل) باش قارهلاوچیلیک سوزلاوچیسی جمشید رسولی نینگ سلاموطندارگه ایتیشیچه، بویروغ صادر بولگنیدن شنبه کونی 23- حمل گچه 4099 محبوس مملکت قماقخانهلریدن قوییب یوباریلگن. رسولی گه کوره، قوییب یوباریلگن کیشیلرنینگ حبسی کم یا-ده حبسی نینگ مدتی دن کم قالگن ایکن.
جناب رسولی نینگ اورغولشیچه، بو توغریده شکایت بولگن هر بیر محبوس 180 رقملی نمره گه علاقه قوریب و شکایتلرینی قارهلاوچیلیک رویخط گه بیرسین.
پروان محلی مسئوللری نینگ ایتیشلریچه، 5 باله شامل 65 محبوس جمهوررئیس غنی نینگ بویروغی اساسیده قوییب یوباریلگن.
شوندهی بیر حالده، حبسی مدتی نی تولدیریب بیراق قوییب یوباریلمهگن محبوسلرنینگ اعتراضی توغریسیده حاضرگچه هیچ کیم هیچ بیر نرسه دیمهگن.
