افغانستان تشقی ایشلر وزیرلیگی تامانیدن ترقه‌تیلگن خبرنامه گه کوره، پاکستان‌نینگ کابلده‌گی ایلچیسی سید ابرار حسین، مذکور وزیرلیک‌ده چقیریلگن. خبرنامه‌ده کیلیشیچه، پاکستان‌نینگ ایلچیسی بیر کون آلدین، پکتیکا ولایتی برمل تومنی‌نینگ انگور اده منطقه‌سیده پاکستان امنیتی کوچلری تامانیدن آتیلگن موشک نتیجه‌سیده، افغانستان چیگره‌یی پولیس‌لریدن بیری هلاک بولگنی‌دن کیین چقیریلگن.
خبرنامه‌گه کوره، تشقی ایشلر وزیرلیگی سیاسی اورین باسری حکمت‌خلیل کرزی، بو واقعه‌نی خواطرلی بیلیب و بونده‌ی بیر واقعه خلق ارا اصولی و دیپلوماتیک علاقه‌لری‌گه قرشی دیگن.
تشقی ایشلر وزیرلیگی سیاسی اورین باسری‌نینگ آگاه‌لنتیریشیچه، بونده‌ی بیر واقعه تکرار بولگن صورتده، ایکی مملکت علاقه‌سی قیینچی‌لیک‌که دوچ کیله‌دی.
گزارشلرگه کوره، 9- سرطان سه‌شنبه کیچه‌سی، پاکستان امنیتی کوچلری افغانستان توپراغیده واقع بولگن حقانی ترماغی‌گه تیگیشلی بیر دینی مدرسه اوستی‌گه حربی اورین ایجاد ایتیش‌گه قصد قیلگن ایکن. بیراق افغانستان امنیتی کوچلری بو قوریلیش‌گه توسیق بولیب و پاکستان کوچلری بیلن توقنشگن.
گزارشلرگه کوره، بو توقنه‌شوو نتیجه‌سیده افغانستان امنیتی کوچلریدن بیرته‌سی و پاکستان امنیتی کوچلریدن 7 ته‌سی هلاک بولگن.
سونگی ییل‌لرده پاکستان امنیتی کوچلری‌نینگ افغانستان توپراغیده ایلگری کیلگنی توغری‌سیده گزارشلر ترقه‌تیلگن و ایریم پیت‌لرده ایکی مملکت امنیتی کوچلری اورته‌سیده توقنه‌شوولر یوز بیرگن.
