مخدرمادهلرگه قرشی کورهشیش مخصوص قرهلاووچیلیک عمومی ریاستی نینگ تورت آیلیک گزارشیده مخدر مادهلرنی قاچاق قیلیش اوتگن ییلگه قرهگنده 5 فایز آشگنی ایتیلهدی.
مذکور گزارشده کیلیشیچه، ییل نینگ بیرینچی تورت آییده 328کیشی مخدر مادهلر قاچاقیگه عیبلهنیب اوشلنگن. مذکور ادارهنینگ رییسی یارمحمد حسین خیلنینگ سوزلریگه، بو شخصلر مرکز شامل ولایتلریده قولگه آلینگنلر. ایتیلیشیچه، بولرنینگ ایچیده 32 نفر دولت ملازمی، 8ته عیال، 2نفر ایران وطنداشی و 15 کیشی ییریک قاچاقی شامل دیر.
اونینگ سوزلریگه کوره، قندهار 36، هلمند23 و ننگرهار20 دوسیه بیلن ولایتلر ایچیده مخدر مادهلر کوپ قاچاق ایتیلگن ولایت سنهلهدی.
جناب حسینخیل، اوچ تُندن کوپراق قاره دارو، یریم تُن مورفین، 11تُن تریاک، 21تُن چرس و اوچ یریم تُن کیمیاوی مواد و مینگلب لیتر ایچکیلیک کشف ایتیلگن لیگینی ایتگن.
افغانستان دنیا بویلب هنوز هم مخدر مادهلر قاچاق ایتیله دیگن ییریک مملکت.
جناب حسینخیلگه کوره، مخدر مادهلر قاچاقیگه قولی بولگن شخصلر 10ییل دن 20 گچه آزادلیکدن محروم ایتیلیشلری نظرده توتیلگن.
شونینگدیک حسین خیل، اوز صلاحیتینی سوء استعمال قیلهدیگن کیشیلر هر اداره و لوازمده بولیشلریگه قرهمی قانونگه تاپشیریله دیلر دیگن.
حسینخیل، بوندن نیچه وقت آلدین بغلان ولایتیدن بدخشانگه مخدر مادهلرنی ییتکزه دیگن ملی مدافعه وزیرلیگینینگ بیر جنرالی اوشلهنیب عدلی وقضایی ادارهلرگه تاپشیریلگنلیگنی بیلدیرگن.
حسینخیلگه کوره، بو توغریده واسطهچیلیک قیلهدیگن شخص اوزی هم محاکمه ایتیلهدی.
اوتگن اون تورت ییل جریانیده افغانستانده مخدر مادهلرگه قرشی کورهشیش اوچون میلیاردلب دالر صرفلهنیشیگه قرهمی، هنوز هم بو مملکت مخدر مادهلرنی ایشلب چیقارووچی ییریک مملکت سنهلهدی.
شونینگدیک افغانستانده ایشلب چیقاریلهدیگن مخدر مادهلردن کته مبلغنی دولت قوراللی مخالفلری قولگه کیریتهدی.
