وروسته له هغې چې په مسکو کې د افغان سولې په اړه روسیې، چین او پاکستان پرته د افغانستان له موجودیته درې اړخیزه غونډه وکړه؛ نو د افغان حکومت له لوري سختو نیوکو سره مخ شو.
نن دوشنبې د (جنوري پر ۹مه) د پاکستان مذهبي او ملتپاله ګوندونه هم دغې ناستې ته په اشارې سره په یوه خبري غونډه کې وویل، چې د افغانستان په اړه هر ډول پرېکړه کې د افغانستان خوښه او موجودیت ضروري دی.
د ملي عوامي ګوند یو مشر او د خېبر پښتونخوا پخوانی اعلی وزیر امیر حیدر خان هوتي وايي، په سیمه کې د سولې له پاره د ټولو هېوادونو همکاري مهمه ده؛ خو د افغانستان له موجودیته پرته پر هغه هېواد هر ډول خبرې د غندنې وړ دي.
حیدرخان هوتي زیاتوي، په سیمه کې د سولې له پاره هغه هڅې چې افغانستان په کې ګډون ونه لري؛ کله هم ګټورې نه شي ثابتېدلی.
د ده په خبره، که چېرې د پاکستان د کومې حیاتي څو اړخیزې موضوع په اړه خبرې کېږي او پاکستان په کې دخیل نه شي؛ خامخا به یې شور پورته کېږي.
بل خوا د پاکستان مذهبي ګوندونونو هم د افغانستان په اړه د روسیې، چین او پاکستان وروستۍ غونډه غندلې ده. دوی همداراز وايي، چې کله د افغانستان په اړه خبرې کېږي؛ نو افغانستان ته دې په کې برخه ورکړل شي.
د پاکستان د مذهبي ګوند جماعت اسلامي مشر سراج الحق په سیمه کې د امن له پاره او د افغان سولې په تړاو د روسیې، چین او پاکستان جوړه شوې غونډه کې د افغانستان نه موجودیت غندي.
سراج الحق وروستۍ غونډې ته په اشارې ويلي، چې دوی په دې برخه کې د افغان ولس سره ولاړ دي.
دی په ټینګار سره وايي، چې افغان سوله د پاکستان له پاره هم مهمه ده؛ نو ځکه باید په دا ډول غونډو کې د افغانستان ګډون لومړیتوب وګڼل شي.
داسې انګیرل کېږي، چې د افغانستان په اړه په دغې ۳ اړخیزې غونډې کې د داعش وسله والې ډلې پر خلاف د افغان طالبانو سره په اړیکو هم خبرې شوې دي.
داسې راپورونه هم خپاره شوي، چې له دې وروسته به د سیمې د نورو هېوادونو په ملتیا روسیه د امریکا او داعش پر خلاف د طالبانو سره هر ډول مالي او پوځي مرستې کوي. په دې اړه ځېنې اسناد او شواهد هم لیدل شوي دي.
