د ولسي جرګې غړیو د پېژندپاڼو وېشلو بهیر، د پېژندپاڼو اخیستلو لهپاره د ښځو د ګډون څرنګوالي او پېژندپاڼو کې د مشخص سټيکرونو نصبولو په اړه، نننۍ غونډه کې د نفوسو د ثبت او احوالو ادارې مشر او د ټاکنو کمېسیون دارالانشا سرپرسته ورغوښتې وه.
د ولسي جرګې ځېنې استازي د حکومت اوسنی نظام ناکامه بولي او وايي، د پېژندپاڼو وېشلو مرکزونو لېرېوالی، د طالبانو ګواښ او د خلکو ځاني خوندېتوب نهشوالی ښيي چې حکومت د ټاکنو لهپاره اراده نهلري.
د ولسي جرګې غړې فاطمه نظري وايي، سره لهدې چې خلک لا هم د پېژندپاڼو اخیستو ته لېواله دي؛ خو د رایورکولو مرکزونو کموالي او امنیتي ننګونو اندېښمن کړيدي.
د ولسي جرګې بل غړی محمدسرور عثمان فراهي وايي چې د هېواد ډېرې ولسوالۍ د طالبانو تر کنټرول لاندې دي او ډېر خلک د طالبانو له وېرې د ولسوالۍ په ۵ کیلومترۍ کې د نوملیکنې لهپاره نهشي تللی.
د ده په خبره، د فراه په ۱۰ ولسوالیو کې له مرکز پرته یو ولسوالۍ ته هم څوک نهشي تللی. د ښاغلي فراهي په وینا، د طالبانو له خبرداري وروسته څوک نوملیکنه نهشي کولی
خو د ټاکنو خپلواک کمېسیون د دارالانشا سرپرسته شهلا حق د ولسي جرګې د غړیو اندېښنو په اړه وايي، د دوی د ۱۴۱۹ مرکزونو د فعالونې له پرواګرامه یوازې ۱۲۷ مرکزونه د امنیتي ستونزو له امله بند پاتې دي.
د دې په وینا، کله یې چې د ټاکنو د نوملیکنې بهیر پیل کړ، ۸۳ نور مرکزونه یې هم پرانېستل چې لهدې سره اوسمهال په ټولو ولایتونو کې ۱۲۹۱ مرکزونه فعال دي.
اغلې حق په ټینګار سره وویل چې د ټاکنو لهپاره د نوملیکنې ۶۰ سلنه مرکزونه په جوماتونو او ښوونځیو کې دي چې په بشپړ ډول د دې مرکزونو امنیت خوندي دی.
