د بشري حقونو خپلواک کمېسیون او د مدني بنسټونو مسوولان د بینالافغاني خبرو اترو له پیلېدو مخکې د ۵ زره طالب بندیانو د خوشې کولو په اړه لارښوونې ته په اشارې وايي، د دغو بندیانو د خوشې کولو لپاره مناسب او روښانه کړنلاره نشته.
د بشري حقونو خپلواک کمېسیون مرستیال نعیم نظري نن په کابل کې د یوې خبري غونډې پر مهال وویل، هغه طالبان چې له حکومت سره بندیان دي، بېلابېل جرمونه یې کړي او باید هماغسې چلند ورسره وشي.
د نوموړي په وینا، هغه کسان چې جنګي جرمونه یې کړي او د بشریت پر وړاندې یې جنایت کړی، باید د خوشې کېدونکیو طالبانو په نوملړ کې شامل نه شي.
نظري ټینګار کوي چې د اساسي قانون له مخې، د بندیانو خوشې کولو په اړه د ولسمشر واکونه محدود دي او یوازې افغانان او د جګړې قربانیان د هغوی د خوشې کولو حق لري.
د بشري حقونو او تاوتریخوالي د له منځه وړلو موسسې رییس عبدالودود پدرام وايي، د طالب بندیانو د خوشې کولو په تړاو د یوه روښانه میکانیزم نه موجودیت داسې اندېښنې پیدا کړي چې خوشي شوي کسان به بېرته د جګړې لیکو ته ولاړ شي.
د مدني ټولنې بنسټونو رییس عزیز رفیعي وايي، هېواد اوس په حساس سیاسي پړاو کې دی او سیاستوال باید د یوه واحد دریځ په غوره کولو سره هېواد او خلک له دغو شرایطو وباسي.
طالبانو بیا له افغان حکومت سره د بینالافغاني خبرو اترو د پیل لپاره د ۵ زره طالب بندیانو خوشې کول د شرط په توګه وړاندې کړي دي.
