نمایندهلر کینگشینینگ بیرینچی و ایکینچی اورین باسرینی تنلش خصوصیده اوتکزیلگن اوچینچی ایچکی سیلاو نتیجهسیز یکونلندی.
اوتگن (چهارشنبه کون، 19- حوت) 208 نماینده بیرینچی و ایکینچی اورین باسرلیک نامزدلریگه آواز بیرگن و اوشبو چوکیلرنی قولگه کیریتهدیگن نامزدلر 105 آواز آلیشی کیرهک.
اوشبو سیلاوده بیرینچی اورین باسرلیک نامزدلری همایون همایون و ذکریا ذکریا، 99 و 49 آواز قولگه کیریتیب هیچ بیری یوتوققه ایریشمهگن.
شونینگدیک، ایکینچی اورین باسرلیک نامزدلری احمد بهزاد، محمداکبر استانکزی و فرهاد صدیقی، 58، 40 و 59 آواز قولگه کیریتیب، مذکور پستگه ایریشه آلمهگنلر.
نمایندهلر کینگشینینگ باشلیغی عبدالرؤوف ابراهیمی، ایکینچی اورین باسرلیک سیلاوینینگ ایکینچی دورینی احمد بهزاد بیلن فرهاد صدیقینینگ اورتهسیده یولگه قویگن و بو سیلاوده هم هیچ بیر نامزد یوتوققه ایریشمهگن.
نمایندهلر کینگشی جاری هفته دوشنبه کون آلتینچی ییللیک ایشینی باشلهدی.
مجلس نمایندهلریدن بیرقطارینینگ اوشبو موضوع توغریسیده ایتیشیچه، سلبی بیلشوولر، قومی، مالی و حزبی مسئلهلر باعث، اولر مجلس اداری هیأتینی تَنله آلمهگن. اولرگه کوره، نمایندهلردن کوپینچهسی آق آواز بیرهدی.
بو توغریده اقبال صافی و عبدالرحیم ایوبینینگ سلاموطندارگه ایتیشیچه، نمایندهلردن بیرقطاری بو ایشلری بیلن اوتمیشلردیک قیتهدن بیرینچی و ایکینچی اورین باسرلیککه ایریشیش اوچون سعی و حرکت قیلهدی.
سنامجلسینینگ اداری هیأتی سیلهندی
عین حالده، سنامجلسینینگ اداری هیأتینی تورت ینگی اعضاسی سناتورلر تامانیدن تنلندی.
فرهاد سخی حریفیدن ایلگری اوتیب، محمدعلم ایزدیار بیرینچی اورین باسر صفتیده و حسیبالله کلیمزی رقیبی آصف صدیقینی شکست بیریب، سنامجلسینینگ ایکینچی اورین باسری صفتیده تنلنگن.
شونینگدیک، عبدالله قرلق رقیبی گلاحمد عظیمینینگ شکست بیریب، بیرینچی کاتب و نجیبه حسینی رقیبی قیس وکیلدن ایلگری اوتیب، سنامجلسینینگ ایکینچی کاتبی صفتیده سیلهنگن.
