امیدلر و تشویشلر؛ یقینده پایتخت کابلده افغانستان دولتی، تینچلیک عالی کینگشی همده گلبدین حکمتیار رهبرلیگیدهگی حزب اسلامی هیئتی نمایندهلری اورتهسیده تینچلیک بیتیمی امضالندی. ایکله تامان گلبدین حکمتیارنی دولتگه قرشی جنگ قیلیشدن قول تارتیشی بارهسیدهگی قرارینی افغانستانده اوزاق ییللردن سونگ تینچلیک – آسایشتهلیک برقرار ایتیش اوچون مهم قدم بولگنیگه امید بیلدیرماقده لر.
اوشبو تینچلیک بیتیمیگه بیر نیچه آیدن سونگ تامانلر ارا اوتکزیلگن مذاکرهلردن کیین قول قوییلهدی. بو بیتیم اساسیده دولت گلبدین حکمتیار آتینی بیرلشگن ملتلر تشکیلاتی و امریکا نینگ قاره لیستیدن آلیب تشلش اوچون سعی و حرکت آلیب باره دی، حزب اسلامینینگ دولت تورمهلریدهگی محبوسلرینی آزاد ایتیب مذکور حزبگه وفادار ایش بیلرمان متخصصلرنی دولت ادارهلری همده امنیتی کوچلر صفلریگه کیریش لیککه امکان یره تهدی. حکمتیار و حزب اسلامی اعضالرینی اوتگن قیلمیشلری اوچون جنایی جوابگرلیککه تارتیلمس لیکلری و اولر اوچون قضایی مصئونیت عملی ایتیلیشی تامانلر ارا عملگه آشیریلگن کیلیشوو نینگ حکمتیار طرفیگه بیریلگن اساسی امتیازلریدن بیری سنهلهدی.
عین حالده گلبدین حکمتیار رهبرلیگیدهگی حزب اسلامی افغانستان اساسی قانونینی رسماً تن آلهدی. دایمی آتیش – کیسیننی عملگه آشیریب، اوزینینگ حربی تشکیلاتینی اورتهدن آلیب کیتهدی. شونینگدیک ترورچی گروهلر بیلن علاقهلرینی کیسیب، ترور حرکتلرینی قوللب قوتلهمهیدی.
حزب اسلامی و افغانستان دولتی ارا امضالنگن تینچلیک بیتیمی جمهور رییس محمد اشرف غنی و گلبدین حکمتیارلر تامانیدن امضالنگنیدن سونگ کوچگه کیریتیلهدی.
بو بیتیم افغانستانده طالبلر حاکمیتی قوله تیلگنیدن سونگ مملکتده دوام ایته دیگن اوروشنی توتختهتیش اوچون عملگه آشیریلگن مهم قدم سنهلهدی. چونکه حکمتیار و اونینگ جنگریلری اوتگن 15 ییل جریانیده افغانستان دولتی و خلق ارا حربی کوچلرگه قرشی اوروشیب کیله دیگن اوچینچی مهم گروه سنهلهدی. امریکا دولتی و بیرلشگن ملتلر تشکیلاتی نینگ امنیت کینگشی گلبدین آتینی ترورچیلر رویخط گه کیریتگن.
گلبدین حکمتیار باشقروویده بولگن رادیکال حربی – سیاسی حرکتنی دولت بیلن کیلیشیووی مملکتده تینچلیکنی تامینلش جریانیگه قنچهلیک ایجابی تاثیر کورستیشی ممکن؟
ایریم تامانلر مذکور بیتیمنی دولت بیلن باشقه گروهلر اورتهسیده کیلیشیش زمینهلرینی یرهتیش همده مذکور گروهلرنی تینچلیک جریانیگه قوشیلیشلری اوچون مهم بیر تورتکی بولیشیگه ایشانه دیلر. اما بو آره ده بیر نرسهنی ایسدن چیقارمسلیک کیرهک. او هم بولسه حزب اسلامی همده دولتگه قرشی جنگ قیله دیگن باشقه گروه لر ماهیتی و وضعیتینی بیلیش اهمیت کسب ایتهدی.
بیرینچیدن اوزاق ییللر اوروشلریدن بیران بیر مهم نتیجه آله آلمهگن حکمتیار و اونینگ حزب اسلامی حرکتی حاضرگی کونده افغانستاندهگی اوروش معادلهسیده اوزینینگ سابق اورنینی قولدن بیریب تشقی حامیلری نظریدن چیتده قالگن. باشقه بیر تاماندن ینه نامعلوم ییللرگهچه بوندهی بیر وضعیتده قالیش حزب اسلامینی استه سیکین صحنهدن چیتلهتیلیشیگه آلیب کیلردی. اوشبو عامللردن علاوه حکمتیار یاشی بیر ییرگه باریب قالگنی هم مذکور حزبنی دولت بیلن کیلیشیب، ایچکریدن سیاسی فعالیتلرینی عملگه آشیریش لیککه اوندهدی. حزب اسلامی نینگ بیر قطار کادرلرینی اوزاق ییللردن بیری دولت قدمهلریده مهم اورینلرگه ایگه بولگن لیکلری هم حکمتیارنی بوندهی بیر قرارنی قبول قیلیش لیککه ترغیب ایتگن.
دولتگه قرشی جنگ قیله دیگن باشقه گروهلر جملهدن طالبلر و حقانی ترور ترماغی وضعیتی حزب اسلامیدن انچه فرق قیلهدی. حاضرگی کونده مذکور گروهلر اوز تشقی حامیلری اینیقسه پاکستاننینگ دقت مرکزیده تورگنلر. مذکور گروهلرنی اوز موقعلرینی اوزگرتیریشلری اسلام آباد نینگ جاسوسلیک اداره لری و حربی کوچلری نینگ قراریگه باغلیق بیر مساله بولیب قالماقده.
ایندیلیکده حزب اسلامینینگ دولت بیلن تینچلیک بیتیمی مملکتده دوام ایته دیگن جنگ جبههلریگه قندهی اوزگریش آلیب کیلهدی؟ دیگن سوراق اوز اوزیدن پیدا بولهدی. کیینگی ییللرده حزب اسلامینی اوز جنگریلرینی قولدن بیریب بارگنی نظرگه توتیلگن حالده مذکور بیتیمنی افغانستان وضعیتیگه کته بیر اوزگریش آلیب کیلمسلیگی ممکن لیگی بارهسیده گپیریش ممکن. چونکه حکمتیار جنگریلری مملکت نینگ هیچ بیر منطقهسیده کته حربی جبههلرنی باشقر مه یدیلر. مذکور حرکت نینگ یوزلب جنگریلری طالبلر و یا داعش صفلریده جنگ قیلماقده. اولرنی حاضرگی کونده حکمتیار ایستگی بیلن تینچلیک جریانیگه قوشیشلری نا ممکن دیک کورینهدی.
حزب اسلامی نینگ تینچلیک جریانیگه قوشیلیشی افغانستان خلقیگه سوو و هوادیک ضرور بولگن تینچلیکنی تامینلُش اوچون مهم حسابلنهدی. حکمتیار طرفدارلری نینگ اوتگن ییللرده کسب ایتگن اچیق تجربهلریدن یخشی اورگنیب، ملی منفعت اساسیده عمل قیلیشلری جبر دیده افغانستان خلقی امیدلرینی رویابگه چیقریشگه خذمت قیله دی. عکس حالده مذکور حزب اعضالری مقدس سنلمهگن قومی و تار دایره ده گی سیاسی منفعتلری اوچون تینچلیک بیتیمینی سؤ استعمال ایتیشلری مملکتده وضعیتنی تاباره چیگللشیدن باشقه نتیجه آلیب کیلمس لیگی ممکن. در واقع افغانستان خلقی حزب اسلامی بیلن دولت نمایندهلری ارا امضالنگن تینچلیک بیتیمیگه شک و شبهه بیلن کوزهته دیلر.
هر حالده حکمتیار رهبرلیگیدهگی حزب اسلامی نینگ تینچلیک جریانیدن حمایت ایتیشی افغانستانده اوزاق ییللر جنگ قیلیب کیلگن حربی – سیاسی بیر جنگری جریاننی تینچلیک و برقرارلیکنی تامینلش سری همکارلیک کورسهتیشی افغانستان، منطقه قاله بیرسه دنیاده اوزاق مدتلی اوروش لر گه سیاسی یوللر آرقلی برهم بیریش لیک یونهلیشیده مهم بیر تجربه سنهلهدی.
