د افغانستان شمالي او شمالختیځو ولایتونو په ګډون د ځېنو ولایتونو اعتراضونو په دوام کابلښاریانو او د ملي جنبش ګوند پلویانو نن په کابل ښار کې اعتراضیه غونډه وکړه.
دوی د نورو ولایتونو معترضینو د غږ په بدرګه کولو سره کابل ته د ولسمشر لومړي مرستیال جنرال عبدالرشید دوستم راستنیدلو او فاریاب کې د ولسي پاڅونوالو قوماندان او د جنرال دوستم ځانګړي استازي نظامالدین قیصاري خوشېکولو غوښتنه وکړه.
معترضینو حکومت پر قومي تبعیض تورن کړ او د ولسمشر پر ضد يې شعارونه ورکول.
دوی خبرداری ورکړ، که غوښتنو ته يې رسیدنه ونهشي؛ پراخ لاریونونه به کړي.
معترضینو خبرداری ورکړ چې د اړتیا په صورت کې به د پرلت خېمې ودروي او را روانو ټاکنو سره به پرېکون وکړي.
دغه راز، د تخار ولایت څو ښارونه هم د پراخو لایونونو شاهدان وو.
هغو متعرضینو چې د تخار ولایت په رستاق ولسوالۍ او تالقانو ښار کې لاریون وکړ؛ د جنرال عبدالرشید دوستم بېرته راستنېدلو او نظامالدین قیصاري خوشېکولو غوښتنه يې وکړه.
د تالقانو ښار معترضینو د والي دفتر، څارنوالي او څو بهرنۍ موسېسې وتړلې.
دوی د حکومتي ادارو او بهرنیو دفترونو کارکوونکیو ته خبرداری ورکړ چې لهدې وروسته خپل کار ته دوام ورنهکړي.
تخار کې د جنرال عبدالرشید دوستم د پلویانو لاریون نن ۱۳ مې ورځې ته وغځېد. معترضینو د تالقانو ښار په بېلابېلو سیمو کې د پرلت خېمې ودرولې. په همدومره وخت کې د تالقانو بازار تړلی و او معترضین هټیوالو ته د هټیو پرانېستلو اجازه نه ورکوله.
په ورته وخت کې مزار ښار هم نن د ملي جنبش ګوند پلویانو اعتراض کړیو. دوی چې له جمعې ورځې راهیسې د ټاکنو کمېسیون ولایتي دفتر تړلی؛ وايي چې د جنرال دوستم بېرته راتګ او نظام الدین قیصاري تر خوشې کولو پورې خپلو اعتراضونو ته دوام ورکوي.
شاوخوا دوې اوونۍ کېږي چې د ملي جنبش ګوند او د افغانستان ژغورنې ایتلاف پلویانو د په فاریاب، جوزجان، بلخ، بدخشان او بغلان په ګډون د هېواد یو شمېر ولایتونو کې اعتراضونه کړي او د ولسمشر لومړي مرستیال جنرال عبدالرشید دوستم بېرته راستنېدلو او د نظامالدین قیصاري خوشېکولو غوښتونکي دي.
