د ولسي جرګې یو شمېر وکیلانو د کابل ګارنیزیون د قوماندان محاکمې او ګوښه کېدو غوښتنه وکړه.
دغو غړو د شنبې په ورځ (اکټوبر۱۵مه) د دې جرګې عمومي غونډه کې له حکومتي مشرانو وغوښتل، چې د کابل ګارنیزیون قوماندان ګل نبي احمدزی په دنده کې د غفلت په سبب له دندې ګوښه کړي.
د چهارشنبې په شپه د کارته سخي پر زیارت او دغه راز، د چهار شنبې ورځ په بلخ کې پر ویرجنو بریدونو کې لسګونه کسانو ته مرګ ژوبله واوښته.
د ولسي جرګې دغه غړي وايي، چې د کابل ګارنیزیون په کارته سخي کې پر زیارت له ترهګریز بریده خبر و خو د دې پېښې مخنیوي له پاره يې هېڅ اقدام نه دی کړی.
د ولسي جرګې دوه غړي غلام حسین ناصري وايي، د ګارنیزیون قوماندان ګل نبي احمدزی هغه وخت خبر ورکوي، چې ځانمرګي برید رامنځته کېږي.
نوموړي زیاته کړه، چې دوی يې له خبر سره سم باید مخنیوی وکړي.
له بل لوري د یادې جرګې غړې شکیبا هاشمي بیا وايي، چې د پېښې له خبرېدو سره سم باید دوی خپل معلومات له استخباراتي چارواکو سره شریک کړي.
د ولسي جرګې رییس عبدالروف ابراهیمي هم وایي، چې امنیتي مسوولینو د محرم لسمې مراسمو امنیت سم نه و نیولی، نو ځکه خو د ده پروینا بې ګنا کسان ووژل شول.
ابراهیمي زیاته کړه، ترهګر په دغه ډول مراسمو کې د خلکو په نښه کولو سره غواړي د افغانستان قومونو او مذهبونو ترمنځ واټن رامنځته کړي.
هڅه مو وکړه په دې اړه د کابل ګارنیزیون قوماندانۍ نظر هم وپوښتو، خو له څوځله اړیکو سره سره هم ونه توانیدو.
