ولسي جرګې د ډالرو په وړاندې د افغانیو ارزښت رالوېدو او په ۱۳۹۷ مالي کال کې د پراختیايي پروژو نهعملي کېدو په اړه د کرنې، اوبو لګولو او مالدارۍ وزیر نصیراحمد درانی او د مرکزي بانک رییس خلیل صدیق استجواب کړل.
د مرکزي بانک رییس خلیل صدیق د ولسي جرګې عمومي غونډې کې وویل، ناامني، بېثباتي، لږ تولید، ناسم سیاسي وضعیت، پر پولو نهکنټرول او پر اېران بندیزونه د ډالر په وړاندې د افغانۍ ارزښت رالوېدو اصلي لاملونه دي.
د مرکزي بانک رییس وکیلانو ته ډاډ ورکړ چې یاد بانک د وضعیت د کنټرول توان لري، خو په وینا یې، د پیسو مینځلو قانون ځینو بدلونونو ته اړتیا لري چې دوی یې وړاندیز کړی دی.
بلخوا د کرنې، اوبو لګولو او مالدارۍ وزیر نصیراحمد درانی که څه هم په پروژو کې ستونزې مني، خو ډاډ ورکوي چې د حل لهپاره یې اقدام کړی دی.
درانی وايي، د کرنې وزارت د زعفرانو د قاچاق مخنیوي او له غاصبانو د فارمي ځمکو په راګرځولو کې پاتې راغلی او په بشپړه توګه یې مخه نهشي نیولی.
دراني که څه هم د چا نوم وانهخیسته، خو زیاته یې کړه چې د زعفرانو قاچاقبرو او د فارمي ځمکو غاصبانو نوملړ به دې جرګې ته ولېږي.
نصیراحمد درانی وايي، کرنې وزارت د مالي کال یوازې ۳ سلنه بودیجه لګوي چې په وینا یې بسنه نهکوي. نوموړي له ولسي جرګې وغوښتل چې د یاد وزارت مالي بودیجه زیاته کړي.
د کرنې وزیر زیاته کړه، د وچکالې اغېزو کمولو په موخه یې په بېلابېلو ولایتونو کې ۵۶ زره ټنه غنم وېشلي او د راروان ژمي لهپاره یې د خوراکي توکو او د اړتیا وړ لومړنیو توکو چمتو کولو لهپاره یې د ۵۰ میلیونه افغانیو غوښتنه کړې ده.
بلخوا د ولسي جرګې رییس عبدالرووف ابراهیمي، له حکومت وغوښتل چې د افغانیو ارزښت رالوېدو مخنوي لهپاره دې د پولي سېسټم بشپړه او ځوابویونکې تګلاره دې جوړه کړي.
