د افغانستان د اوبو او انرژۍ وزارت سرپرست وزير سلطان محمود وايي، چې د دغه وزارت له لوري د هېواد د ټولو سيندونو د خوندیتوب له پاره ځانګړې شوې بودجه يواځې د اموسيند د خونديتوب نيمايي لګښت هم نه شي پوره کولای.
نوموړي دا خبرې د مشرانو جرګې د یکشنبې ورځې عمومي غونډې ته وکړې او زياته يې کړه، چې د اوبو او انرژۍ وزارت د افغانستان د ټولو سيندونو د دپولو د قوي کولو له پاره ۲،۲ ميليونه ډالره بودیجه ځانګړې کړې په داسې حال کې، چې يواځې د امو سيند د خوندیتوب له پاره يو ميليارډ ډالرو ته اړتيا ليدل کيږي.
همدارنګه نوموړي وویل ۱۱۰ سربندونو جوړول، چې د خلکو ژوند ورپورې تړلی دي ۱۲ ميلیونو ډالرو ته اړتيا لري.
د انرژۍ او اوبو وزارت سرپرست زياته کړه، چې د افغانستان د سربندونو او اوبو د اصلاح له پاره به د نړېوال بانک په مرسته دغه وزارت په پنځوو کلونو کې ۲۰۰۰ پروژې بشپړې کړي.
دا په داسې حال کې ده، چې د اصلاحاتو او ښې حکومتولۍ په برخه کې د ولسمشر ځانګړي استازي هم په کندوز ولایت کې ویلي، له کندوزه ترتخاره او حېرتان پورې دامو سيند غاړو لګښت د اټکل له مخې ۱۵۰ ميليارډو ډالرو ته رسيږي.
