هلمند کې یوشمېر باغلرونکي او کرونګر هر کال د خپلو محصولاتو لپاره د بازار له نه موجودیت سر ټکوي او وايي، هغه مهال یې چې محصولات ورسېږي، بیې یې ټیټېږي او د ګټې پر ځای، زیان کوي.
خو د هلمند د کرنې ریاست مسوولان وايي، سږ کال یې د ملي اردو په خوراکي نوملړ کې د هلمند هنډوانو د شاملولو لپاره د حکومت له مرکزي ادارې سره خبرې کړي او د ملي تدارکاتو پروسې له بشپړېدو وروسته به د دغه ولایت له باغلرونکو او کرونګرو هنډوانې وپېرل شي.
د دغه ولایت د کرنې رییس زلمی الکو وايي، په دې سره به د هنډوانو بیې لوړې او باغلرونکي به د خپلو محصولاتو له ګټې برخمن شي.
د هلمند د کرنې ریاست د پروګرامونو مسوول سید رفېعالله قلم وايي چې پر پوځ باندې د هنډوانو پلورلو لپاره بشپړ چمتووالی لري.
د قلم په وینا، سږ کال په هلمند کې پر ۲۲۵۰ هېکټاره ځمکې هندوانې کرل شوي چې ۶۹ زره او ۷۵۰ ټنه حاصلات به ولري.
د یادونې ده چې دولت دوه کاله وړاندې د میدان وردګ ولایت مڼو ته هم د امنیتي ځواکونو په خوراکي نوملړ کې ځای ورکړی دی.
اقتصادي کارپوهان بیا باور لري چې د حکومت له لوري د کروندګرو او باغلرونکو د هنډوانو پېرل د هغوی پر اقتصاد مستقیم اغېز کوي او د کورنیو تولیداتو لپاره د بازارموندنې لامل هم کېږي.
په هلمند کې یو اقتصادي کارپوه صفا وايي، دا ډول پروګرامونه باید دوام ومومي؛ ځکه له یوې خوا به د کورني بازار د جوړېدو لامل شي او بلهخوا به کروندګر د هنډوانو کرلو ته وهڅول شي.
هلمند، د هېواد په سوېل کې پروت ولایت دی چې ډېری خلک یې پر کروندګرۍ، برګرۍ او مالدارۍ بوخت دي او له دې لارې د خپل ژوند اړتیاوې پوره کوي.
