په کندوز او هلمند ولایتونو کې جګړې زور اخیستو د ولسي جرګې د یو شمیر غړو غبرګونونه راپورولي.
دوی وايي، چې په نظام کې دننه او د باندې ځينې کسان د امنیتي سرتیرو پر ضد کار کوي.
د ولسي جرګې غړی غلام حسین ناصري په پخواني ولسمشر نیوکه کوي او وایي، نن کندوز د جګړې په اور کې سوځي او هغه کورونه، چې په کندوز کې سوځي او له منځه ځي نه د پخواني ولسمشر حامد کرزي او نه هم د هغه د مرستیالانو دي.
نوموړي زیاته کړه: "کرزی په کوم منطق، په کوم دلیل، او د چا په اجازه د پښتون، تاجک، ازبک، هندو، بلوچ او ترکمن وژونکو ته ورونه وایي ؟" .
پخواني ولسمشر حامد کرزي د خپل حکومت پر مهال په ځلونو طالبانو ته د ورو خطاب کړی، چې څو ورځې وړاندې د برهان الدین رباني په تلین کې هم خپله دغه جمله تکرار کړه او د ځينو ګډون کوونکو له غبرګون سره مخ شو.
په همدې حال کې د ولسي جرګې بلې غړې شکیبا هاشمي وویل، چې ځینې کسان په ښکاره د امنیتي سرتیرو ملاتړ، خو په پټه د دښمن ملاتړ کوي.
میرمن هاشمي وایي، د افغانستان د جزا قانون په ۱۸۲ ماده کې راغلي، چې دغه ډول کسان باید اعدام شي.
" هغه کسان که سیاسي او که عادي خلک دي چې پر ښکاره له امنیتي سرتیرو ملاتړ کوي خو په پټه یې دښمنان دي باید د اساسي قانون ۱۸۲ مادې پر بنسټ اعدام شي."
له بلې خوا د ولسي جرګې غړي سید علي کاظمي د پخواني ولسمشر حامد کرزي وروستیو ویناو ته په اشارې سره چې د طالبانو په اړه یې کړې وې وایي، دا باید په ډاګه شي چې حکومت غواړي له طالبانو سره خپلې جګړې ته دوام ورکړي ترڅو خلک د امنیتي ځواکونو ترڅنګ پاتې شي او له طالبانو سره جګړه وکړي او یا هم د پخواني ولسمشر پر خبره ځینې ولایتونه طالبانو ته وسپاري.
دا په داسې حال کې ده، چې ځو ورځې وړاندې د افغانستان پخواني ولسمشر حامد کرزي له یوې رسنۍ سره په خپله مرکه کې ویلي وو، چې طالبان هم د افغانستان دي او حق لري چې د هیواد ځینې سیمې ونیسي.
د کرزي دغو خبرو د هیواد ځینې وګړي په غوسه کړي او ځینو سیاسي فعالانو هغه د طالبانو په ملاتړ تورن کړی.
